Сәвәбсиз 3 йил түрмидә ятқан әсқәрҗан билән үрүмчи вәқәси һәққидә сөһбәт (2)

Биз өткән қетимқи программимизда, сәвәбсиз 3 йил түрмидә ятқан уйғур яш әсқәрҗан билән үрүмчи вәқәси һәққидә елип барған сөһбәт хатирисини аңлатқан идуқ, бүгүн йәнә сөһбәтниң давамини аңлитимиз.

5 - Июл үрүмчи вәқәсиниң келип чиқиш сәвәби тоғрисида әсқәрҗан билән сөһбәт елип бардуқ. Униң ейтишичә, шявгүән вәқәсини тинч усул билән һәл қилиш үчүн адаләт тәләп қилип бир гуруппа оқуғучилар вә ханим - қизлар һөкүмәт бинасиниң алдиға берип, шявгүән вәқәсини кәлтүрүп чиқарған хитай җавабкарлирини тутуп җазалашни тәләп қилғанда әмәлдарлар уларниң тәләплирини аңлимастин қайтуривәткән, улар қайтиветип хәлқ мәйданиға кәлгәндә “бизгә адаләт керәк” дегәнгә охшаш шуар товлиған, буниңға қарши чиққан хитай әскәрлири бир уйғур қизға оқ атқан шуниң билән намайишчиларниң сани көпийип 10 миңдин ешип кәткән, кейин намайиш қаршилиқ тоқунушқа айлинип кәткән вә вәзийәт контролдин чиқип кетип қирғинчилиқ келип чиққан.

Әсқәрҗан 5 - июл күни кечидә үрүмчи кочилирида таң атқучә оқ авазини аңлиғанлиқини вә нурғун балиларниң шу кечидә өлтүрүлгәнликини ипадилиди.