Кучаниң алақаға базирида сақчилар намайишчи аммиға оқ чиқарған, нурғун адәм тутқун қилинған

Мухбиримиз қутлан
2014-05-20
Елхәт
Пикир
Share
Принт
Төмүр решаткилиқ һойлиға соланған һиҗапланған уйғур аяллири.
Төмүр решаткилиқ һойлиға соланған һиҗапланған уйғур аяллири.
RFA/Ruqiye

Бүгүн куча наһийәсиниң алақаға базирида қанлиқ вәқә йүз берип нурғун адәм тутқун қилинған. Сақчилар нәқ мәйданда оқ чиқирип намайишчи аммидин бирқанчисини өлтүргәнлики мәлум болмақта.

Нәқ мәйдандин игилишимизчә, бирқанчә күндин буян куча наһийә базири вә униңға тәвә һәрқайси йезиларда даириләрниң йүзини япқан, узун яғлиқ салған яки сақал қойған кишиләрни тәкшүрүш һәрикити елип берилған. Нәтиҗидә бирмунчә аяллар тутқун қилинип базарлиқ һөкүмәт қорусиға солап қоюлған. Бүгүн сәһәрдә алақаға базарлиқ оттура мәктәпниң мудириму буйруқ чүшүрүп бешидин яғлиқини елишни рәт қилған қиз оқуғучиларни базарлиқ һөкүмәткә һәйдәп апирип солап қойған.

Қамап қоюлған аяллар вә қиз оқуғучиларниң аилә тавабиатлири, уруқ-туғқанлири һәмдә ғәзәпләнгән амма алақаға базарлиқ һөкүмәт алдиға топлишип қаршилиқ намайиши өткүзгән. Узун өтмәйла намайишчиларниң сани көпийип бирәр миң адәмгә йәткән. Ғәзәпләнгән намайишчилар қамалған аяллар билән қиз оқуғучиларни қоюп беришни тәләп қилған, әмма даириләр буниңға җаваб бәрмигән. Ахирида намайишчиларниң ғәзипи өрләп мәктәп мудири турсун қадирни қаттиқ урған. Алақаға базарлиқ һөкүмәтниң башлиқи әхмәт ариға кирип җедәлни айримақчи болған болсиму, лекин намайишчилар униму сүр-тоқай қилған.

Узун өтмәйла куча наһийә тәрәптин бирқанчә һәрбий машина вә броневикларда қораллиқ алаһидә сақчилар нәқ мәйданға йетип кәлгән. Улар келипла намайишчи аммиға қаритип оқ чиқарған. Нәқ мәйдандики шаһитларниң билдүрүшичә, һәр йерим саәттә бир қетимдин уда үч қетим шиддәтлик оқ етилған. Қанчә адәмниң өлүп, қанчисиниң яриланғанлиқи вә қанчә адәмниң тутқун қилинғанлиқи ениқ әмәс.

Вәқә һазир тинчитилған болуп, алақаға базири әтрапида һәрбий һаләт йүргүзүлгән.

Биз вәқәниң тәпсилати һәққидә ениқ мәлумат елиш үчүн алақаға базарлиқ сақчихана билән дөңқотан йезилиқ сақчиханиға телефон қилдуқ. Улар телефонни қобул қилған болсиму, лекин вәқәниң тәпсилати һәққидә мәлумат беришни рәт қилди.

Алақаға базарлиқ сақчиханиниң нөвәтчи хадими өзиниң бу һәқтә соаллиримизға җаваб берәлмәйдиғанлиқини, сақчи башлиқи билән сиясий йетәкчиниң нәқ мәйдандин һазирла қайтип келип қоралларни өткүзүватқанлиқини, уларниң телефон қобул қилишқа вақти йоқлуқини билдүрди.

Биз арқидинла алақаға базири тәвәсидә яшайдиған аһалиләрдин икки аилигә телефон қилип әһвал сүрүштүрдуқ. Телефонимизни қобул қилған икки аял өзлири көргән вә аңлиған әһваллар һәққидә мәлумат бәрди.

Тәпсилатини аваз улиништин аңлиғайсиз.

Пикирләр (0)
Share
Толуқ бәт