Парникчи әли рәһимниң баянлири уйғур деһқанлириниң йәрсиз қеливатқанлиқини ашкара қилмақта

Мухбиримиз қутлан
2015-04-22
Share
xoten-dehqan.jpg Уйғур деһқанлар йеңи көчәт тикиватқан көрүнүш. 2012-Йили 28-май, хотән.
AFP

Уйғур парникчи әли рәһимниң көктат парниклири хитай йеза секретари тәрипидин тартивелинғандин кейин, униң қисмәтлири уйғур деһқанлири дуч келиватқан әң чоң хәвп - йәрдин айрилиш һадисисини ашкара қилмақта.

Әли рәһимниң баянлири қәшқәр йеңишәһәр наһийә йеңиериқ йезисиниң һәрқайси кәнтлиридә көрүлүватқан мундақ бирқанчә әһвалдин бешарәт бәрмәктә:

Йеза секретарлири хитай көчмәнлириниң уйғур елиға йәрлишиштики асасий қатлам таянчи болуп қалған

Уйғур парникчи әли рәһимниң билдүрүшичә, 2011-йили йү фамилилик хитай кадир қәшқәр йеңишәһәр наһийәсиниң йеңиериқ йезисиға секретар болуп, үч ай өтмәйла әли рәһим вә башқа 911 аилә уйғур деһқанниң көктат парниклирини тартивалиду.

У әли рәһимниң көктат парникини дәсләптә өзиниң бир юртлуқ адими болған бир хитай аялға өткүзүп бериду. Бу аял парникта гүл өстүрүп беқип узун өтмәйла өз юртиға қечип кетиду. Йеза секретари йү бу парникларни иккинчи қетим йәнә бир аилә хитай көчмәнгә бериду. Узун өтмәй уму қечип кетиду. Үчинчи қетим бу парниклар бир җүп әр-аял хитайға берилиду. Йезилиқ һөкүмәт пул чиқирип уларға қудуқ қезип бериду һәмдә парниклар үчүн толуқлима ярдәм пули бериду. Хитай көчмәнлиригә қаритилған бу хил етибар сиясәтләрдин һечбир йәрлик уйғур деһқан бәһримән болалмайду.

Йезилиқ һөкүмәттики уйғур рәһбәрләр қорчаққа айландурулған

Ели рәһимниң баянлиридин мәлум болушичә, хитай секретар йү йеңиериқ йезисиниң уйғур йеза башлиқи вә уйғур муавин секретариниң көз алдида әли рәһимниң парниклирини тартивалған.

Уйғур кадирларниң һечқайсиси униңға бир еғиз гәп қилалмиған. Ели рәһим йезилиқ парткомниң уйғур муавин секретарға йилларчә дәрд ейтқан. У: "һеч болмиғанда 9 парникимдин бирини болсиму қайтуруп бәрсә, мән рази идим!" дегинидә уйғур муавин секретар мундақ дегән: "мән йү шуҗиниң кәйпияти яхши чағда униңға дәп бақай". Һалбуки, аридин бирқанчә йиллар өткән болсиму, лекин йезилиқ парткомниң уйғур муавин секретари йезиниң хитай секретарға бу гәпни дейишкә җүрәт қилалмиған.

Әли рәһим мәйли йеза башлиқи болсун яки йезилиқ партком вә йезилиқ һөкүмәтниң муавин башлиқлири болсун, уйғур рәһбәрләрниң һечқайсиси хитай секретар йүниң тәстиқисиз иш қилалмайдиғанлиқини билдүрди.

Йеза-кәнтләрдики мол-һосуллуқ йәрләр хитай көчмәнлириниң қолиға өтүшкә башлиған

Парникчи әли рәһимниң баянлири йеңиериқ йезиси тәвәсидики туприқи мунбәт, сүйи әлвәк, мол-һосули юқири терилғу йәрләрниң аста-аста хитай көчмәнлириниң қолиға өтүп кетиватқанлиқидин бешарәт бәрди.

У өзи билән қошулуп 12 аилилик уйғур деһқан җан беқиватқан көктат парниклириниң йеза секретариниң бирла буйруқи билән бир аилә хитай көчмәнгә өткүзүп берилгәнликини билдүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт