Қарамайлиқ ханим: “8-декабир от паҗиәси” дә оқутқучи аминә давут өз мәсулийитини ада қилди

Ихтиярий мухбиримиз еһсан
2016-02-02
Share
qaramay-dostluq-kinoxana-ot-apiti-4.jpg Қарамайдики от апитидә пәрзәнтлири көйүп кәткән анилар.
Social Media

“8-декабир қарамай от апити” уйғур райониниң йеқинқи заман тарихидики әң паҗиәлик от апити болуп, аминә давут ханим шу апәттә қаза қилған оқутқучиларниң бири.

Аминә давут болса қарамай шәһәрлик 2-оттура мәктәпниң оқутқучиси, 4 балиниң аниси. У, хизмәттики әстайидиллиқи вә мәсулийәтчанлиқи билән көп қетим мәктәп вә қарамай шәһәрлик маарип идариси тәрипидин “мунәввәр оқутқучи” болуп мукапатланған.

-1989Йилдин башлап қарамай шәһәрлик 2-оттура мәктәптә “тәҗрибә синип” синип тәсис қилинип, башланғуч синипқа 7 яшлиқ өсмүрләр қобул қилиниду һәмдә шу синипқа мәктәпниң тәклипи билән аминә давут синип мәсули болиду.

1994-Йили 8-декабир, қарамай шәһәрлик достлуқ киноханисида маарип хизмәт йиғини ечилиду. Қарамай шәһиридики 7 толуқ оттура, 8 башланғуч мәктәптин болуп җәмий 796 оқутқучи-оқуғучи вә үрүмчидин кәлгән бир қисим кадирлар қатарида аминә муәллимму синипидики 20 артуқ оқуғучиси билән йиғинға қатнишиду.
Биз алди билән қарамай шәһәрлик 2-оттура мәктәпкә телефон қилип, әһвал игиләшкә тиришқан болсақму, телефонни қобул қилидиған адәм чиқмиди.

Биз йәнә шу вәқә йүз бәргән вақитта 2-оттура мәктәп толуқ йиллиқида оқуватқан қарамайлиқ ханим арқилиқ аминә давут муәллимниң 4нәпәр оқуғучисини қутулдуруш йолида һаятидин айрилған паҗиәни игиләшкә тириштуқ.

Зияритимизни қобул қилған қарамайлиқ ханим, өзиниң әйни чағда мәктәптә вә җәмийәттин аңлиғанлирини әсләп өтти.

Униң ейтишичә, кулубқа от кәткәндин кейин, аминә муәллим оқуғучилирини тарқақлаштуруп, өзи биллә кулубтин сиртқа чиқип кетиду, әмма оқуғучиларниң сани алғанда алимҗан абдухалиқ, адилҗан, пирдун қурбан, мәнсур абләт қатарлиқ 4 нәпәр оқуғучисиниң йоқлуқини билгәндин кийин, башқа оқуғучиларни дәрһал бихәтәр орунға тарқақлишишини тапилап, өзи йәнә күлүп ичигә оқуғучилирини издәп кирип кетиду.

Шу әснада кулубниң ишики токлуқ йөгәлмә ишик болғачқа, от сәвәбидин ток үзүлгәндә өзлүкидин чүшүп кетип етилип қалиду. У чағда ичидин отниң қоюқ иси чиқип, аминә муәллим 4нәпәр оқуғучиси билән бирликтә ис елип һаятидин айрилиду.

Биз қарамайдики от апитидә һаятидин айрилған уйғурларниң уруқ -туғқанлирини зиярәт қилип, шу вақиттики әһвални һәмдә һазирқи ойлиғанлирини игиләшкә тиришқан болсақму, әмма вәқәгә 21йилдин ашқан болғачқа нәқ мәйданда бар болғанларни яки уларниң аилә тавабиатлирини зиярәт қилишқа имканимиз болмиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт