«Хәлқара уйғур тәтқиқати журнили»ниң йеңи сани елан қилинди

Мухбиримиз әркин тарим
2016-08-19
Елхәт
Пикир
Share
Принт
«Хәлқара уйғур тәтқиқати» журнилиниң 7 - сани
«Хәлқара уйғур тәтқиқати» журнилиниң 7 - сани
RFA/Erkin Tarim


Түркийәдә түрк вә уйғур тилида чиқиватқан «хәлқара уйғур тәтқиқати» журнилиниң 7 - сани оқурмәнлири билән йүз көрүшти. Бу санда һазирқи заман уйғур тили, қәдимқи заман уйғур тили, уйғур әдәбияти, тарихи, фолклори, өрп - адити билән мунасивәтлик 13 мақалә һәмдә китаб баһалаш вә тонуштуруш билән мунасивәтлик 2 мақалә йәр алған болуп, түркийә вә дуняниң һәрқайси җайлиридики уйғуршунасларниң йеңи тәтқиқат нәтиҗилири оттуриға қоюлған.

2013 - Йилидин тартип изчил нәшр қилинип келиватқан , «хәлқара уйғур тәтқиқати журнили»ниң бу санида қәдимқи, йеқинқи вә һазирқи заман уйғур тили вә әдәбияти, тарихи вә фолклори үстидики тәтқиқатларға алаһидә орун берилгән болуп, мәзкур журналниң 7 - сани тоғрисида техиму тәпсилий мәлумат игиләш үчүн журналниң қануний игиси измир егә университети оқутқучиси профессор доктор алимҗан инайәт әпәнди, журналниң баш тәһрири адәм өгәр әпәнди вә журналда мақалиси елан қилинған нәвшәһир университети доктора оқуғучиси абдувели һәсән әпәндиләр билән телефон сөһбити елип бардуқ.

Профессор доктор алимҗан инайәт әпәнди мәзкур журналниң 7 - санида йәр берилгән мақалиләр тоғрисида мәлумат берип мундақ деди: «журналда түркийәдә оқуватқан доктора оқуғучиси абдуваһит һәсәнҗанниң «һазирқи заман уйғур әдәбиятидики муһим язғучилардин зордин сабир» мавзулуқ мақалиси, әдәбиятшунас абләт бәркиниң «зунун қадирниң уйғур әдәбиятидики орни» намлиқ мақалиси, түркийә нәвшәһир университети оқутқучиси доктор адәм өгәр билән күбра алтин йилдиз ханимниң «уйғурларда шаманизмдин исламийәткичә яман руһқа айлиниши» намлиқ мақалиси, әнқәрә университети оқутқучиси профессор доктор саадәттин гөмәч әпәндиниң «уйғур дастанлири вә қутатқубилик һәққидә» намлиқ мақалиси, измир егә университети оқутқучиси профессор доктор зәки қаймаз әпәндиниң «қутатқубилик тәтқиқатиға нәзәр» намлиқ мақалиси, профессор доктор алимҗан инайәтниң «оғуз дастани тоғрисида» намлиқ мақалиси, зулһаят өткүр ханимниң «уйғурларда мазар адәтлири» намлиқ мақалиси қатарлиқларға орун берилгән.
xelqara-uyghur-tetqiqati-zhurnal-jurnal-7-san-2016-2.jpg
Профессор доктор алимҗан инайәт әпәнди журналниң бу санида елан қилинған даңлиқ тарихчи зәки вәлиди тоған әпәндиниң «оғузхан» дастани тоғрисида мәлумат бәрди.

У, журналниң 7 - санида бәзи китабларниңму тонутулқанлиқини баян қилди.

Булардин башқа йәнә, журналда язғучи аблимит садиқниң үрүмчи хәлқ нәшрияти тәрипидин нәшр қилинған «хитай хәлқ мәсәллири топлими» намлиқ китаби, доктор әркин әмәтниң түркийә әнқәрәдә нәшр қилинған «чақчақчи һисам қурбан» намлиқ китаби тонуштурулған.

Түркийәдә нәшр қилиниватқан «хәлқара уйғур тәтқиқати журнили»ниң баш тәһрири түрк нәвшәһир университети оқутқучиси адәм өгәр әпәнди журналниң 7 - саниниң әң муһим алаһидиликлиридин бириниң ингилизчә, түркчә вә уйғурчә мақалиләргә орун бәргәнлики икәнликини баян қилди.

Түркийә нәвшеһир университети әдәбият факултитида доктора оқуватқан һәсәнҗан әпәнди «хәлқара уйғур тәтқиқати журнили»ға юқири баһа бәрди.

«Хәлқара уйғур тәтқиқати журнили» 3 йилдин бери изчил һалда нәшр қилиниватқан түрк вә уйғур тилида елан қилиниватқан тор журнили болуп, дунядики уйғуршунаслар униңдин пайдиланмақта.

Пикирләр (0)
Share
Толуқ бәт