Алматада барин паҗиәси қурбанлирини хатириләш паалийити өткүзүлди

Ихтиярий мухбиримиз ойған
2017-04-06
Share
barin-xatirilesh-almata-1.jpg 1990-Йили 5-апрелда уйғур елиниң барин йезисида йүз бәргән қанлиқ паҗиәниң 27 йиллиқини хатириләш паалийитидин көрүнүш. 2017-Йили 5-апрел, алмата.
RFA/Oyghan

5-Апрелда алмата шәһириниң султанқорған мәһәллисидики "арзум" кафеханисиға җәм болған уйғурлар 1990-йили 5-апрелда уйғур елиниң барин йезисида йүз бәргән қанлиқ паҗиәниң 27 йиллиқи мунасивити билән хатириләш паалийити өткүзди. Дәсләп мәһәммәт һаҗим азадлиқ вә әркинлик үчүн қурбан болғанларға атап қуран оқуди.

Асасий доклат билән сөзгә чиққан сиясәтшунас қәһриман ғоҗамбәрди өз тарихини билмигән хәлқниң келәчикиниң болмайдиғанлиқини, уйғурларниң өз азадлиқи, әркинлики үчүн һәтта җенини қурбан қилишқа тәйяр болуш лазимлиқини алаһидә тәкитлиди. У, шәрқий түркистан җумһурийити миллий армийисиниң қурулуш тарихи, униң җәңгивар йоли, җәңчиләрниң мисли көрүлмигән қәһриманлиқи һәққидә өз қарашлирини оттуриға қойди. Қ. Ғоҗамбәрди шундақла баринлиқларниң омумән уйғур хәлқиниң миллий азадлиқ һәрикитигә қошқан төһписини, бу қозғилаңниң әһмийитини алаһидә тәкитләп, хитай даирилириниң бу қозғилаңни рәһимсиз басқанлиқини қаттиқ әйиблиди. Натиқ уйғур елидики вәзийәт, хитай һакимийитиниң бу әлдики бастуруш сиясити, рабийә қадир башлиқ дуня уйғур қурултийиниң кейинки вақитлардики паалийәтлири, миллий давада һәрикәт елип бериватқан уйғур яшлирини тәрбийиләш вә башқиму мәсилиләр һәққидә мәлумат бәрди.

Андин сөзгә чиққан яш паалийәтчиләрниң бири илшат иминоф әпәнди, йеқинда белгийә пайтәхти бирюсселда уйғур яшлирини демократийә, кишилик һоқуқ, қануний билимләр билән тәрбийиләш курсиниң елип барған паалийәтлири һәққидә мәлумат берип, уларниң әһмийитини тәкитлиди.

Дуня уйғурлири аяллар комитети рәисиниң оттура асия бойичә орунбасари асийәм турдийева өз сөзидә вәтән мустәқиллиқини, миллий давани тәшвиқ қилишниң һәр бир уйғур үчүн муқәддәс вәзипә икәнликини, қазақистандики уйғурларниң бу йолдики һәрикәтлирини җанландурушниң муһимлиқини, шундақла бу ишқа болупму яшларни җәлп қилиш лазимлиқини оттуриға қойди.

"инайәт" җәмийәтлик бирләшмисиниң әзаси тәләт һәмраеф қазақистандики уйғур зиялийлириниң җәмийәттики роли, алмата шәһири достлуқ мәһәллисиниң турғуни арупҗан мусайеф русийәниң һәм коммунистик һакимийәтләрниң уйғурларниң миллий азадлиқ һәрикити һәм уйғур хәлқиниң бешиға елип кәлгән азаб-оқубәтлири үстидә тохталди. У шундақла белгийәдә тәрбийиләш курсида болуп қайтқан яшларға чоң утуқлар тилиди.

Радийомиз зияритини қобул қилған дуня уйғур аяллар комитетиниң әзаси шәһәрбанум сәйдуллайева мәзкур паалийәт һәққидә мундақ деди: "мән бүгүн интайин тәсирләндим. Барин вәқәси биздә вәтән давасини елип беришта чоң рол ойниди. Биз бу давани һечқачан тохтатмаслиқимиз керәк. Вәтәндики хәлқимиз шунчилик бесим астида болсиму, һәр даим өзиниң әркинлики, инсаний һәқлири үчүн күришип келиватиду. Биз шу хәлқимизни даим қоллап-қуввәтлишимиз керәк. Хәлқимизгә мушу йәрдә йиғинда болған гәп-сөзләрни йәткүзүп, миллий давани қоллап-қуввәтләштә чоң ишларни елип беришимиз керәк."

Алмата шәһириниң горний гигант мәһәллисиниң турғуни тиливалди қурбаноф мәзкур паалийәттә сөзгә чиққанларниң вәтән даваси, мустәқиллиқ, әркинлик, миллий роһ һәққидә ейтқан сөзлиригә юқири баһасини берип, мундақ деди: "һазир уйғурларда болуватқан вәқәләрни аңлисақ, ичимиз сийрилиду. Уйғурлар үчүн көйүнимиз. Һазир биздә мустәқиллиққа йетиштин улуғ нәрсә йоқ. Шуниң үчүн у бизгә керәк. Мениң дәйдиғиним, билим алайлуқ. Келәчәктә вәтинимизниң азад болушиға бизгә билимлик адәмләр керәк."

У өз сөзидә, қазақистанлиқ уйғурларниң рабийә қадир рәһбәрликидики дуня уйғур қурултийиға һәр җәһәттин ярдәм беришкә тиришиши лазимлиқини, пәқәт бирлик, иттипақлиқ бар йәрдә уйғур хәлқиниң алдида турған улуғ мәқсәт-нишанларға йетиш мумкинликини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт