Torontoda barin inqilabining 27 yilliqi xatirilendi

Ixtiyariy muxbirimiz gülshen abduqadir
2017.04.11
Bingtuan-Xitayliri-we-Barin-Inqilapchiliri-tutqunda.jpg Sürette, barin inqilabchilirini tutush we qirghin qilishqa qatnashqan bingtuen xitay qoralliq "déhqan" liridin bir körünüsh.
File Photo

9-Aprél yekshenbe küni, kanadaning toronto shehiride pa'aliyet élip bériwatqan Uyghur meschiti rehberliki bundin 27 yil burun barin yézisida yüz bergen zeynidin yüsüp bashchiliqidiki barin inqilabining 27 yilliqini xatirilesh yüzisidin, barin shéhitlirining rohigha atap qur'an tilawet qilish pa'aliyiti ötküzdi.

Shu küni toronto waqti sa'et 2 de, toronto we uning etrapidiki sheherlerde yashaydighan köp sandiki Uyghurlar özliri meblegh chiqirip sétiwalghan Uyghur meschitige jem bolup 32 pare qur'anni öz'ara bölüshüp oqup chiqti.
Qur'an tilawet qilish axirlashqandin kéyin, barin inqilabi mezgilide atush shehiride yashighan, eyni chaghdiki barinni öz ichige alghan atush we pütün Uyghur diyarining weziyitidin toluq xewerdar Uyghur ziyaliysi haji mamut ependi köpchilikke barin inqilabi we uning istratégiyilik pilanliri heqqide melumat bérip ötti.

Hazir torontoda yashawatqan dinni zat abdu'éziz ependi Uyghurlar wetinining 1949- yili xitay hökümiti teripidin bésiwalghandin étibaren, siyasiy, ijtima'iy, medeniyet we diniy jehetlerde, téximu éghir ehwalda qalghanliqini otturigha qoyup ötti. U yene bundin bir esir burun atushta yashap ötken tereqqiyperwer diniy ölima abduqadir damollam qatarliq ilghar pikirlik Uyghur ölimalirining weten- milletning kélechiki heqqide éytqanliridin misallar élip ötti.

Xetme qur'an pa'aliyiti jeryanida ziyaritimizni qobul qilghan toronto shehiride yashawatqan Uyghur ziyaliysi tuyghun abduweli bilen tahir mijit ependi barin rohining Uyghur milliy rohi ikenliki heqqidiki köz qarashlirini otturigha qoyup ötti.

Shu künki pa'aliyetke toronto Uyghur meschitige rehberlik qilish komitétining re'isi shewket imam riyasetchilik qildi.

Torontodiki Uyghur meschiti bundin 3 yil awwal torontodiki Uyghur jama'itining meblegh chiqirishi bilen 280 ming kanada dollirigha banka qerzisiz sétiwélin'ghan bolup, hazir torontodiki Uyghur jama'itining nezir chiragh we bashqa pa'aliyetlerni ötküzidighan hem merike zali, hem ibadet qilidighan meschiti hem Uyghur öyi süpitide qollinilip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.