Türkiyening istanbul we qeyseri sheherliride eysa yüsüp alptékinni xatirilesh pa'aliyiti ötküzüldi

Ixtiyariy muxbirimiz erkin tarim
2017-12-18
Share

Pütün ömrini Uyghur diyarining erkinlikige atighan eysa yüsüp alptékinning wapatining 22-yiliqini xatirilesh pa'aliyiti bu yilmu Uyghurlar eng köp olturaqlashqan istanbul we qeyseri sheherliride ötküzüldi.

Istanbulda pa'aliyet élip bériwatqan sherqiy türkistan wexpi bilen eysa yüsüp alptékin wexpi birlikte istanbulning tarixiy meschitliridin biri bolghan fatih meschitide qur'an tilawet we uning hem Uyghur diyarining erkinliki üchün jénidin ayrilghanlarning rohigha atap du'a qildi. 17-Dékabir küni sa'et 3 yérimda bashlan'ghan pa'aliyette türklerning aditi boyiche jama'etke shéker tarqitip bérildi. Wapatining 22-yili munasiwiti bilen ötküzülgen pa'aliyetke Uyghur diyaridin istanbulgha kélip yerleshken Uyghur we qazaqlarning teshkilat mes'ulliri, türkiyediki siyasiy partiyelerning istanbuldiki mes'ulliri we köp sanda jama'et ishtirak qilghan.

Bu heqte ziyaritimizni qobul qilghan sherqiy türkistan wexpi bash katipi doktor ömer qul ependi munularni dédi: "Imam ependi eysa yüsüp alptékinning wapatini xatirilesh üchün uningghila emes, sherqiy türkistan üchün shéhit bolghanlarning rohigha, sherqiy türkistan dewasi üchün xizmet qilghanlargha, hayatidin ayrilghanlargha atap du'a qildi. Hemmimiz du'a qilduq. Nahayiti yaxshi ötti. Bu jeryanda meschitning hoylisida jama'etke aditimiz boyiche gül süyi bilen shéker tarqitip berduq. 17-Dékabir küni bu ulugh yolbashchimizni we uning ish-izlirini yene bir qétim xatiriligen bolduq."

17-Dékabir küni etigen sherqiy türkistan wexpi re'isi abdulxemit awshar bashchiliqidiki bir guruppa Uyghur eysa yüsüp alptékinning qebrisini ziyaret qilip, du'a qilip xatirligendin kéyin fatih meschitidiki pa'aliyetke barghan. Bu pa'aliyetke ishtirak qilghan Uyghur ziyaliysi ferhat tengritaghli ependi pa'aliyetning yaxshi ötkenlikini tekitlidi.

Ferhat tengri taghli ependi 1980-yillardin kéyin tunji bolup türkiyege oqushqa chiqqan Uyghur ziyaliyliridin biri bolup, u, köp qétim eysa yüsüp alptékin ependi bilen mungdishish pursitige ige bolghan. U, eysa ependining küresh hayatigha yuqiri baha berdi.

17-Dékabir küni Uyghurlar eng köp olturaqlashqan jaylardin biri bolghan qeyseridimu eysa yüsüp alptékinni xatirilesh pa'aliyiti ötküzüldi. "Musteqil sherqiy türkistanliqlar hemkarliq jem'iyiti"mu'awin re'isi xalmurat süydüngli ependi qeyseride ötküzülgen pa'aliyetning yaxshi ötkenlikini, eysa yüsüp alptékin körsitip bergen yolining qanchilik toghra yol ikenlikini chonglarning yene bir qétim özlirige chüshendürüp bergenlikini bayan qildi.
Xalmurat süydüngli ependi qeyseride tughulup chong boluwatqan Uyghurlarning eysa yüsüp alptékinni menggü unutmaydighanliqini bayan qildi.

1901-Yili qeshqerning yéngisar nahiyeside dunyagha kelgen eysa yüsüp alptékin 1995-yili 12-ayning 17-küni istanbulda alemdin ötken idi. Uning jinaza namizi fatih meschitide qilin'ghandin kéyin türkiyening sabiq bash ministiri adnan menderes, sabiq dölet re'isi turghut özallar depine qilin'ghan topqapi mazarliqigha depne qilin'ghan idi. Uning jinaza murasimigha türkiyening dölet rehberliri gülchembirek ewetken we ishtirak qilghan bolup, chong téléwizyeler neq meydandin tarqatqan idi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet