Gérmaniyediki noruz pa'aliyitide istiqlal marshi orunlandi

Gérmaniyediki Uyghurlarning 2013-yilliq noruz pa'aliyiti istiqlal marshi orunlash we diniy zatlargha ton kiydürüsh qatarliq shekillerde intayin ehmiyetlik ötküzüldi.

Pa'aliyet ishtirakchiliri janliq usullarda xatirilen'gen bu pa'aliyettin hayajan'gha chömgenlikini bildürse, pa'aliyetke sorun teminligen orunlarmu tesirlinip soruni taqash waqtini uzartip berdi.

31-Mart küni gérmaniyening myunxén shehiridiki “ Medeniyet öyi” namliq pa'aliyet merkizide noruz pa'aliyiti ötküzüldi. Gérmaniyening herqaysi sheherliridin yighilghan 300din artuq Uyghur we chet'ellik kishiler mol mezmunluq bu pa'aliyetke ishtirak qildi. Chüshtin kéyin sa'et altige qeder dawamlashqan bu noruzluq pa'aliyet köp xil sen'et nomurliri bilen méhmanlarda zor hayajan peyda qildi.

Bu qétimqi pa'aliyetni merkizi myunxén shehiride bolghan yawropa sherqiy türkistan birliki teshkilati uyushturghan bolup, mezkur teshkilatning re'isi enwerjan ependi ziyaritimizni qobul qilip öz tesiratlirini bildürüp ötti.

“Gérmaniyede 2013-yilliq noruz” namliq bu pa'aliyetning muqeddimiside, aliptékin telim- terbiye merkizide Uyghur ösmürlirige diniy jehettin bilim bériwatqan kishilerge yawropa sherqiy türkistan birliki teshkilati teripidin ton teqdim qilindi. Ton kiydürüsh ishigha Uyghur milliy herikiti rehberliridin erkin aliptékin ependi teklip qilindi.

Diniy ustazlardin hébibullah qarim ton kiygendin kéyin öz memnuniyiti we tileklirini bildürüp ötti. Arqidin weten ichi sirtidiki weten azadliqi yolida qurban bolghan shéhitler eslep ötülüp, sehnide merhum küresh küsen ependi ijat qilghan istiqlal marshi oquldi.

Pa'aliyet jeryanida biz bezi yashlarning bu pa'aliyetke bolghan tesiratlirini bilish pursitige érishtuq. Sorunda yene güzel Uyghurche usullar oynaldi, shé'ir-qoshaqlar oqup ötüldi. Axirida pütün zalda tamashibin Uyghurlar usulgha chüshüp, noruz keypiyatini yuqiri pellige kötürdi.

Mezkur pa'aliyet ötküzülgen medeniyet merkizining mes'ulliridin biri, axirida söz élip, Uyghurlarning bu noruz bayrimidin bekmu hayajanlan'ghanliqini, özining 10 minut waqit uzartip bérishni xalaydighanliqini hemde kishilerning bes-beste otturigha chüshüp oynighan erkin usullirini yene bir qétim tekrarlap bérishini ümid qilidighanliqini sözlidi. Jarangliq naxsha, muzika sadasi ichide chong-kichik, er-ayallar otturigha chüshüp, qizghin noruz keypiyati we hayajan peyda qilish bilen bu qétimqi pa'aliyetke xatime berdi.