Полат аләмдар уйғурларға салам йоллиди

Ихтиярий мухбиримиз әркин тарим
2013.07.29
Nejati-Shashmaz-Ablikim-Idris.jpg Көп қисимлиқ “бөриләр вадиси” филиминиң баш ролчиси нәҗати шашмаз әпәнди билән америка уйғур бирләшмисиниң башқуруш һәйити әзаси абликим идрис әпәнди. 2013-Йили 27-июл, истанбул.
RFA/Erkin Tarim

Көп қисимлиқ “бөриләр вадиси” филиминиң баш ролини ойнаватқан нәҗати шашмаз рамизан ейи мунасивити билән уйғурларға салам йоллиди. Дуняниң һәр қайси җайлирида яшаватқан уйғурлар истанбулға йоли чүшкәндә көрүшүшни арзу қилидиған сәнәтчиләрдин бири нәҗати шашмаз, йәни филимдики исми билән полат аләмдар. У 27-июл күни кәч америка уйғур җәмийитиниң идарә һәйәт әзаси абликим идрис, шәрқий түркистан вәхпи баш катипи җелил туран вә уйғур зиялийси абдурешит абдулхәмит қатарлиқ кишиләр билән учрашти. Истанбулниң нишантеши мәһәллисидики пана филим ширкитиниң ишханисида елип берилған бир саәтлик учришиш ахирлашқандин кейин абликим идрис әпәнди бизгә телефон қилип, нәҗати шашмаз әпәндиниң уйғурларға йоллайдиған салимини әркин асия радиоси арқилиқ йәткүзүшимизни тәләп қилди. Биз нәҗати шашмаз әпәнди билән телефон сөһбити елип бардуқ.

У алди билән уйғурларға салам йоллиғандин кейин дуняда зулум түгигичә “бөриләр вадиси” филиминиң давамлишидиғанлиқини баян қилип мундақ деди:
Мән нәҗати шашмаз, истанбулдин шәрқий түркистанға чиң көңлүмдин салам йоллаймән. Радио долқунлири арқилиқ силәр билән учраштим. Өйлириңларда тор арқилиқ “бөриләр вадиси” филимини көрүватисиләр, алла рази болсун. “бөриләр вадиси” филимини көрүшкә давам қилиңлар. Худайим буйруса “бөриләр вадиси” филими давамлишиду. Дуняда зулум вә бесим түгигичә “бөриләр вадиси” филимиму түгимәйду. Биз һәр даим зулумға қарши туримиз. Инсанларниң зулумға бесимға қарши чиқиши керәк.

У радио долқунлири арқилиқ уйғурларниң рамзан ейини мубарәкләйдиғанлиқини баян қилип мундақ деди:
“рамизан ейи мунасивити билән шәрқий түркистандики пүтүн қериндашлиримға, достлиримға, чоңлиримға, кичиклиримгә һөрмитимни вә салимимни йоллаймән. Рамизан ейиңлар мубарәк болсун. Худа силәргә яр йөләк болсун!.

Биз бу учришиш һәққидә техиму тәпсилий мәлумат елиш үчүн америка уйғур җәмийитиниң башқуруш һәйити әзаси абликим идрис әпәнди билән сөһбәт елип бардуқ. У полат аләмдарниң уйғурлар тоғрисида мәлумати барлиқини, уйғурларға наһайити бәк қизиқидиғанлиқини деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.