Xelq'araliq türk dunyasi yermenkiside Uyghurlar tonutulmaqta

Ixtiyariy muxbirimiz erkin tarim
2016-03-11
Élxet
Pikir
Share
Print
Xelq'araliq türk dunyasi yermenkiside Uyghur yémekliri tonutulmaqta. 2016-Yili mart, türkiye.
Xelq'araliq türk dunyasi yermenkiside Uyghur yémekliri tonutulmaqta. 2016-Yili mart, türkiye.
RFA/Erkin Tarim

Türkiyening ottura rayonigha jaylashqan qeyseri shehiride ötküzülgen 11-nöwetlik xelq'araliq türk dunyasi yéza igilik yermenkiside Uyghurlarning tamaq medeniyiti, kiyim-kéchekliri we Uyghurlarning bügünki weziyiti tonutulmaqta.

Qeyseri wilayetlik yéza igilik idarisi teripidin qadir xas medeniyet merkizide ötküzülgen 11-nöwetlik xelq'araliq yermenkige 14 dölet, we türkiyedin 490 shirket we idare-jem'iyet qatniship mehsulatlirini tonutmaqta. Uyghurlargha wakaliten sherqiy türkistan medeniyet we hemkarliq jem'iyiti mexsus 2 bölüm échip, biride Uyghur medeniyitini, yene biride bolsa xitayning Uyghurlargha élip bériwatqan bésim siyasiti eks ettürülgen resimlerni ésip, üstellerning üstige türkiyede Uyghurlar toghrisida neshr qilin'ghan kitab-zhurnallarni qoyup, tamlargha her xil lozunkilarni ésip Uyghurlarning hazirqi échinishliq weziyitini tonutmaqta. Échilish murasimigha qeyseri walisi, sheher bashliqi we köp sanda axbarat xadimliri qatnashqan bolup, Uyghurlar achqan bölme ziyaretchilerning qattiq diqqet-étibarini qozghighan.

Sherqiy türkistan medeniyet we hemkarliq jem'iyiti re'isi séyit tümtürk ependi bu heqte melumat berdi.

11-Nöwetlik xelq'araliq türk dunyasi yermenkiside Uyghur tamaqlirini qilip, tonutuwatqan Uyghur ayalliridin xeyrigül xanim ziyaritimizni qobul qilip bügün yermenkining birinchi küni nurghun kishilerge Uyghur tamaqlirini tonutqanliqini bayan qildi.

Gérmaniyedin kélip bu pa'aliyetke qatnishiwatqan bir Uyghur ayal téléfon ziyaritimizni qobul qilip yermenkide peqetla Uyghur tamaqlirinila emes, xitaydiki Uyghurlargha élip bériwatqan zulumnimu anglitiwatqanliqini tekitlidi.

Yermenkide Uyghur tamaqlirini qilip tonutuwatqan meryem xanim bu pa'aliyetning Uyghurlarni tonutushta zor ehmiyetke ige ikenlikini bayan qildi.

Séyit tümtürk ependi sherqiy türkistan medeniyet we hemkarliq jem'iyitining 11 yildin béri mezkur yermenkige qatniship Uyghur medeniyitini tonutqandin sirt, xitayning Uyghurlargha élip bériwatqan zulumini anglitiwatqanliqini bayan qildi.

Yermenke üch kün dawamlashmaqchi.

Toluq bet