Алматада яш‏-өсмүрләрниң бокс мусабиқиси өткүзүлди

Ихтияри мухбиримиз ойған
2017-05-12
Share
Boks-musabiqisidin -korunush   Бокс мусабиқә мәйданидин бир көрүнүш, 2017 - йили 8-май
RFA/Oyghan

8-Майда алмата шәһиридә яш-өсмүрләр арисида уюштурулған җумһурийәтлик 12-қетимлиқ бокс мусабиқиси аяқлашти. Мусабиқини қазақистанниң "динамо" тәнһәрикәт җәмийити, алмата шәһәрлик һакимчилиқи вә ички ишлар башқармиси билән бирликтә уюштурған. У қазақистан вәтән һимайичилири күни һәм совет-герман урушиниң аяқлашқанлиқиниң 72 йиллиқи, шундақла  уруш қәһримани мәсим яқупоф хатирисигә беғишланди. Бәш күнгә созулған мәзкур мусабиқигә 300 дин ошуқ  қиз-йигит қатнашти. Боксчилар асасән алмата шәһири вә алмата вилайитиниң, шундақла талдиқорған, тараз шәһәрлириниң һәр хил бокс кулублириниң вәкиллири.

Мусабиқә уюштурғучилириниң бири, қазақистанниң бокс бойичә хизмәт көрсәткән тренери рәһим сидиқофниң ейтишичә, мундақ мусабиқиләр һәр йили өткүзүлүп, униң қатнашқучилири барғансери көпәймәктә. Дәсләп қетим бокс мусабиқиси алмата шәһириниң султанқорған мәһәллисидә орунлашқан мәсим яқупоф намидики оттура мәктәптә өткүзүлгән. Р. Сидиқоф мәзкур мусабиқиләрниң уюштурулуш мәқсити һәққидә тохтилип, мундақ деди: "биринчи нөвәттә, балилар арисида  өз хәлқиниң тарихини билиш, униңға һөрмәт билән қараш, урушта болған ата-бовилирини қәдирләш вә уларни унтумаслиқ охшаш ишларни тәшвиқ қилиш. Шундақла биз бу арқилиқ балиларни яман адәтләрдин сақлаш һәм җәмийәтниң актип пуқралири қилип йетилдүрүш охшаш мәқсәтләрниму көзләватимиз. Биз алмата шәһириниң ички ишлар органлири билән бирликтә "тәнһәрикәткә йол" программиси бойичә мәҗруһ балиларға, йитим-йесирларға, турмуши начар аилиләргә беғишланған хәйрихаһлиқ паалийәтлирини өткүзүватимиз. Көпинчә әнә шундақ аилиләрдин даңлиқ боксчилар чиқиду. Мәсилән, алматалиқ валерий рачкоф дуня чемпийони болған тунҗи қазақистанлиқ боксчи болуп, у йитим балилар өйидә тәрбийиләнгән. Мундақ балилар өзлириниң тиришчанлиқи билән тәр төкүп, әнә  шундақ утуқларға йетиду."

Р. Сидиқоф мәзкур мусабиқигә көплигән даңлиқ боксчиларниң меһман болуп кәлгәнликини, шуларниң арисида уйғур боксчиси, совет иттипақиниң икки қетимлиқ чемпийони аталған абдурешит абдрахманофниңму кәлгәнликини алаһидә тәкитлиди.

Қазақистанлиқ боксчилар ичидин биринчиләрдин болуп "хәлқара дәриҗидики тәнһәрикәт маһири" аталған а. Абдрахманоф радийомиз зияритини қобул қилип, қазақистан мустәқил болғандин буян яш боксчиларға алаһидә ғәмхорлуқ көрситиливатқанлиқини илгири сүрүп, мундақ деди: "һәммә нәрсә уларниң өзлиригә бағлиқ. Һазир көрүватимизки, тәбиитидин талантлиқ балилар өсүп келиватиду. Шундақла уларниң келәчики тренерларғиму бағлиқ. Улар балиларниң қабилийитини яхши билиши, чүшиниши керәк. Балиға баштинла дурус хәт йезишни үгәтмисә, өмриниң ахириғичә хәтни әски язидиған болиду. Боксму худди шуниңға охшаш. Шуниң үчүн яхши бокс мәктипи лазим."

Алматада өткән мусабиқигә уйғурлар зич олтурақлашқан йезилардинму  көплигән яш боксчилар қатнашти. Әмгәкчиқазақ наһийисиниң палтивай йезисидики бокс кулубиниң тренери пәрһат розибақийефниң ейтишичә, бу йәрдин 15 адәм қатнишип, улардин 36 вә 40 килограм салмақта иккиси үчинчи, иккиси иккинчи орунни егиләп, икки боксчи чемпийон аталди. У мусабиқә һәққидә тохтилип, мундақ деди: "мусабиқидин алған тәсират интайин юқири, юқири дәриҗидә уюштурулған, адил баһаланди. Бу мусабиқә уруш қатнашқучилири хатирисигә беғишланған, чүнки биз мушуниң билән яшаватимиз. Биз мәсим яқупоф охшаш қәһриманлиримизни унтумаслиқимиз керәк. Мән шундақ мусабиқиләрни өткүзүватқинидин хушалмән. Мән шундақла бу мусабиқигә көплигән уйғур балилириниңму қатнишиватқанлиқидин хурсәнмән. Балиларға тренер болуп ишләватқинимға тоққуз йил болди. Бу вақит ичидә биздин сәккиз бала қазақистан бойичә алдинқи орунларни алди. Балиларниң ичидә һәр хил милләт вәкиллири бар."

Әмгәкчиқазақ наһийисиниң қаратуруқ йезисидин 12 боксчи кәлгән болуп, уларниң тренери нурәхмәт разийеф алтә тәнһәрикәтчиниң үчинчи орунни, бир боксчиниң иккинчи орунни егилигәнликини билдүрүп, мундақ деди: "биз йеза балилирини боксқа чақиримиз. Биздинму яхши боксчилар чиқиватиду. Мәсилән, "астана арланс" кулубидин дилмурат миҗитоф чиқип келиватиду. Үмидимиз әнә шу. Биз уйғур балилиридин олимпик, дуня чемпийонлирини чиқириш үчүн әмгәк қиливатимиз. Мән қаратуруқ йезисида 2000-йилдин башлап балиларни мәшиқләндүрүватимән. Йигирмә нәччә бала бар. Улар област, җумһурийәт бойичә орунларни елип келиватиду."

Н. Разийефниң ейтишичә, униң кулубида он яштин он бәш яшқичә болған балилар тәрбийилиниватқан болуп, уларниң арисида тәнһәрикәтниң ушу-сәнда, кик-бокс, йәкму-йәк күрәш охшаш түрлиридинму талантлиқ балилар йетилип чиқиватмақта. У шундақла мәзкур мусабиқигә кәлгән даңлиқ уйғур боксчиси абдурешит абдрахманофқа миннәтдарлиқини билдүрүп, көплигән балиларниң униң қолидин мукапатлар елип, буниңдин қаттиқ пәхирләнгәнликини оттуриға қойди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт