Норвегийәдики уйғурлар путбол командиси тәрәққий қилмақта

Ихтиярий мухбиримиз еһсан
2016-04-07
Share
norwegiye-uyghur-putbol-kamandisi-2.jpg Норвегийәдики уйғурлар путбол командиси дортлуқ мукапатиға еришти.
RFA/Éhsan

Уйғурлар норвегийәгә көчмән болуп кәлгили 20 йилдин ашти. Норвегийәгә кәлгән уйғурлар асаслиқ уйғур дияридин кәлгәнләр болуп, норвегийәдә тәхминән 2000 ға йеқин уйғур яшайду.

Норвегийәгә йәрләшкән уйғурлар арисида яшлар көп салмақни тәшкил қилидиған болуп, норвегийә уйғур комитетиниң биваситә тәшкиллиши вә мутәллип әпәндиниң башчилиқида 2007-йили "уйғур путбол командиси "рәсмий қурулған.

Бу путбол командиси қурулғандин буян изчил тәрәққий қилип, норвегийәниң бәш шәһиридә тармақ командиларни қурған.

Уйғур яшлар дәм елиш күнлиридин пайдилинип командилар өз-ара учришип, достлуқ мусабиқә ойнаш арқилиқ яшлар өз-ара тонушидиған, достлуқ, қериндашлиқ бәрпа қилип уйғур дава сепини күчләндүрүшкә түрткилик рол ойнимақта.

Норвегийәдики уйғур путбол командиси норвегийә ичидә һәмдә норвегийәдики башқа иштин сиртқи командилар ара достлуқ мусабиқиси ойнапла қалмай, бәлки шиветсийә, белгийә, голландийәдики уйғур командилар билән йилда бир қетим достлуқ мусабиқиси ойнашни давамлаштуруп кәлмәктә.

Қошна дөләттики уйғур командилар билән пәқәтла мусабиқидики нәтиҗини нишан қилиш әмәс, бәлки уйғур яшлири өз-ара тонушуш, достлуқ орнитиш, әң муһими уйғур дава сепини күчләндүрүшкә асас селиш мәқситидә топ ойнап, путбол васитиси билән һәмкарлиқ вә иттипақлиқини күчәйтмәктә.

Норвегийә уйғур командиси 2011-йили голландийәдә, 2013-йили түркийәниң қәйсири шәһиридә өткүзүлгән "рабийә ханим лоңқиси"ни талишиш путбол мусабиқисидә яхши нәтиҗиләргә еришкән.

Норвегийә уйғур комитетиниң рәиси ниғмәт түрсун әпәнди зияритимизни қобул қилип, уйғур путбол командисиниң қурулуш мәқсити, нишан-ғайилири һәққидә тохтилип өтти.

Норвегийә уйғур путбол командисиниң мәсули мутәллип әпәнди командиниң қолға кәлтүргән нәтиҗилири һәққидә тохталди.

Асаслиқ мусабиқиләрдә команда башлиқи вәзиписини еливатқан команда әзаси музәппәр зияритимиз җәрянида, путбол арқилиқ қериндашлиқ, достлуқни, иттипақлиқини илгири сүргили болидиғанлиқини һәмдә путбол мусабиқилири давамида уйғур тилини қоллинип, уни унтуп қалмаслиққа пайдиси барлиқини әскәртти.

Норвегийәдики уйғур комитетиниң тәшкиллиши арқисида норвегийәдики уйғур җамаити һәр қетимлиқ мусабиқиләрдә путбол командисиға изчил түрдә маддий вә мәниви җәһәттин ярдәмдә болуп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт