Moda éqim naxsha cholpini ablajan awut ayupning tutqun qilin'ghanliqi delillendi

Uyghur rayonidiki moda éqim naxsha cholpini ablajan awut ayup yéza-kentlerge chüshüp, naxsha éytiwatqan körünüshi.

Birqanche heptidin béri muhajirettiki Uyghur ijtima'iy axbarat wasitiliride Uyghur rayonidiki moda éqim naxsha cholpini ablajan awut ayupning tutqun qilin'ghanliqi, hetta beziliride késiwétilgenliki heqqide uchurlar tarqaldi.

Muxbirimizning bügün, cholpanning yurti guma nahiyesige qarita élip barghan téléfon ziyaretliri dawamida, uning nöwette tutqunda ikenliki we eng deslepte guma nahiye sanju yéziliq saqchi xadimliri teripidin tutulghanliqi delillendi.

Moda éqim naxshiliri bilen Uyghur jem'iyitide keng tonulghan naxsha cholpini ablajan awut ayup, bu yil 2-aydin bashlap sehnilerdin ghayib bolghan. Uning ündidar topliridiki dostlirimu, 2-aydin bashlap, uningdin héchqandaq uchur bayqimighan. Uning torgha chiqish, uchur ortaqlishishi qatarliq tor pa'aliyitimu oxshash shu waqitta toxtighan. Bu ehwal aldi bilen uning hérsmen egeshküchilirini endishige salghan. Bir aydin béri radiyomizgha kelgen inkaslarda, ablajan awut ayupning tutulghanliqi izchil halda tekitlenmekte.

Inkaschilardin biri uning ötken yili malayshiyagha chiqqanliqi üchün tutqun qilin'ghanliqini yazsa, yene bireylen, uning xeyr-saxawet ishidin chataq chiqqanliqi, yeni i'ane qilghan pulning bir qismi xitay terep nuqtiliq a'ile dep békitken a'ililerge tégip qalghanliqi üchün tutulghanliqini ilgiri sürdi. Yene beziler bolsa, ablajan awut ayupning naxsha-tékistliridiki millet söygüsining uning tutqun qlinishigha seweb bolghanliqini bayan qilghan.

Torlarda saqlan'ghan ablajan awut ayup heqqidiki xewer we matériyallardiki mezmunlar, yuqiriqi üch xil sewebning hemmisiningla mumkinchilik éhtimalini körsetmekte.

Tonushturulushiche, ablajan awut ayup, 1984-yili guma nahiyesining sanju yézisida tughulghan. 14 Yash waqtida turpanda ikki yil ressamliq oqughandin kéyin, sanju yézisigha qaytip kélip oqutquchiliq qilghan. 2006-Yili ürümchige köchüp kélip, oqush we sen'et pa'aliyiti bilen shughullan'ghan. Bügün uning muhajirettiki hérismenliridin biri radiyomizgha inkas yollap, özining xotendiki bezi qanallar arqiliq, ablajan awut ayupning 3 ay awwal tutqun qilin'ghanliqidin éniq halda xewer tapqanliqini éytti. U yene ablajan awut ayupning yurtigha ziyaretke barghan mezgilide tutulghanliq éhtimalliqini eskertti.

Biz bügün, yeni 15-may küni xotendiki saqchixanilargha téléfon qilip, ablajan awut ayupning ehwali heqqide melumat soriduq. Xadimlarning köp qismi ablajanni tonuydighanliqini éytqan bolsimu, emma uning nöwettiki ehwali heqqide melumat bérelmidi. Xadimlar ablajanning nöwettiki ehwali heqqide melumat bérelmigen bolsimu, emma uning tutqun qilin'ghanliqini inkar qilmidi. Xadimlarning ensiz jawabliridin, ularning ablajan heqqide rast gep qilish emes, u toghrisida éghiz échishtinmu endishe qiliwatqanliqi melum idi.

Guma nahiyelik saqchi idarisi, qaraqash aqsaray saqchixanisi, xoten ilichi saqchixanisi qatarliq orunlar, ehwalni sanju yézisidin igilishimizni tewsiye qildi. Sanju yéziliq saqchixanigha téléfonimiz baghlanmighandin kéyin, biz qyawda saqchixanisigha téléfon qilduq. Bu saqchi xadimi, özining bu heqte melumat bérelmeydighanliqini bildürüsh bilen birlikte, uning sanju yéziliq saqchixana teripidin tutqun qilin'ghanliqini delillidi.

Torda saqlan'ghan bir téléwiziye ziyaret xatiriside, u özining téxi toy qilmighanliqini, chünki kesip jehettin özining yetmekchi bolghan arzu-armanliri barliqini, shunga hazirche köp waqtini sen'et hayatigha merkezleshtürüsh oyida ikenlikini otturigha qoyghan.