Uchturpanda xitay saqchiliri bilen gumandarlar arisida qanliq toqunush yüz bergen

Pichan nahiyisi lükchün bazirida saqchixanigha hujum qilip köydürülgen saqchi mashiniliri. 2013-Yili 26-iyun.

Pichan lükchünde yüz bergen Uyghur pida'iylarning saqchixanigha ot qoyup hujum qilish weqesidin ikki kün kéyin, aqsuning uchturpan baziridimu bir meydan qanliq toqunush yüz bergen.

Weqede aqsu sheherlik saqchi idarisi razwédka bölümining saqchisi enwer eysa pichaqliq hujumgha uchrap éghir yarilan'ghan. Weqe 6-ayning 28-küni uchturpan bazirining qashboyi ahaliler komitétidiki yéngi mehelle meschitining etrapida yüz bergen. Melum bolushiche, weqe saqchilarning saqal qoyghanlarni we léchek artqanlarni tekshürüsh nishani qilip kocha charlawatqan mezgilide yüz bergen. Weqedin kéyin uchturpan weziyiti téximu jiddiyliship xitayning bixeterlik tedbirliri téximu kéngeytilgen we kücheytilgen.

Uchturpan nahiyilik hökümet xizmet binasida nöwette turuwatqan bir xadimni ziyaret

Muxbir: siz nöwette turuwétipsiz, boluwatqan ishlardin xewiringiz bar turuwatamsiz yaki xewersizmu?
Xadim: xewirim bar. Boluwatqan weqeler bek jiq bolghandikin.....

Muxbir: siz xewer tapqan eng yéngi weqe qaysi?
Xadim: maralbéshidiki weqe....

Muxbir: uchturpandikisini dep béring, u qachan, qeyerde yüz berdi?
Xadim: bir ay bopqaldi, uchturpan bazar ichide yüz berdi. Qashbuyi ahaliler komitétining yéngi mehelle meschiti etrapida yüz bériptu dep anglidim.

Muxbir: bu, sizge yighinda uqturulghan uchurmu, kochidin anglighanmu?
Xadim: yighinda uqturulghan, téxi bügünmu sa'et 7de yighin'gha qatniship chiqtim. Shuji hushyarliqinglarni östürünglar, özünglarning hem idarining bixeterlikini qoghdanglar dédi.

Nahiyilik partkom binasida nöwette turuwatqan xadimni ziyaret

Muxbir: weqe yüz bergen yer siz nöwette turuwatqan yerdin qanchilik uzaqta?
Xadim: yéngi mehelle meschiti etrapida bir mehelle arisida yeni asan qéchip kételeydighan, möküwalalaydighan pingfang öyler (yer öyler) bar yerde yüz bériptu.

Muxbir: weqening tepsilatidin xewiringiz boldimu?
Xadim: men peqet kochidin anglidim, bir jüme küni idi, ushtumtutla hemme yerni saqchi qaplap ketti. Xizmetdashlardin anglisam, puqradin biri ölüptu, saqchidin ikkisi yariliniptumish.

Muxbir: sizge yighinda uqturulmidimu?
Xadim: yaq, idare bashliqlirigha ichki paydilinish matériyali arqiliq uqturuptu, biz kochidin angliduq.

Nahiyediki bir qamaqxana ishxanisida nöwette turuwatqan xadimni ziyaret

Muxbir: weqede qanche adem ölüp, qanche adem yariliniptu?
Xadim: ikki saqchi yariliniptu, biri ölüptu dégendek geplerni kochidin anglidim(yighindin emes)

Muxbir: weqe néme sewebtin kélip chiqiptu?
Xadim: meschitke mangghan kishilerning saqilini tekshürüwatqan iken.

Bir idare bashliqini ziyaret

Muxbir: weqening bash-axiridin xewiringiz boldimu?
Xadim: bir qismidin xewirim boldi.

Muxbir: weqe sadir qilghuchilar kimler iken?
Xadim: uni bilmidim, bilidighinim yarilan'ghuchi saqchi enwer eysa, u shu küni aqsudiki doxturxanigha yötkiliptiken, ölgenmu, hayatmu uqmaymen.

Uchturpan bazarliq saqchixanini ziyaret

Muxbir: weqede yarilan'ghan enwer eysa silerning saqchixanining xadimimu?
Xadim: yaq, u nahiyilik j x idarisi razwédka bölümining saqchisi.

Muxbir: uning hazirqi ehwali qandaq.
Xadim: aqsu wilayetlik 1-doxturxanida dawaliniwatidu.

Uchturpan yaköwrük saqchixana bashliqini ziyaret

Muxbir: weqe qandaq sewebtin kélip chiqqan?
Xadim: délogha men arilashmidim. Xizmetdashlardin anglishimche, weqe kocha charlash jeryanida, saqalliq birini tekshürüsh dawamida yüz bériptu.

Muxbir: weqede ölgen, yarilan'ghanlarning sani qanche iken?
Xadim: bu heqte mexsus melumat tapshurup almidim. Anglighinim gumandar étip öltürülüptu, xizmetdishimiz enwer eysa yariliniptu, ehwali éghir iken.

Muxbir: qaysi küni, sa'et nechchide yüz bériptu?
Xadim: 6-ayning 28-küni, pichanda weqe yüz bérip ikki kündin kéyin, jüme künlükte, jümedin burun sa'et 11 lerde yüz bériptu.

Yuqirida uchturpanda xitay saqchiliri bilen gumandarlar arisida qanliq toqunush yüz bergenliki heqqide melumat berduq.