Қағилиқ йилқичидики вәқәдә етилған вә тутулғанлардин 6 нәпириниң кимликлири ашкариланди

Мухбиримиз шөһрәт һошур
2013.08.28
Qaghiliq-nahiyisidiki-Meschit-305.jpg Қағилиқ наһийисидики мәсчит. 2011-Йили ноябир.
RFA/Mehriban

Қағилиқниң йилқичи йезисидики чөллүктә һәрбий мәшиқ елип бериливатиду дәп қарилип етилған вә тутулған 26 кишидин 6 нәпириниң кимликлири ашкариланди. Мәлум болушичә, кимлики ашкариланған бу 6 кишидин бир нәпири йилқичидин, қалған 5 нәпири йилқичиға қошна болған йезидин.

Мухбиримизниң вәқәдин кейинки муқимлиқ хизмәтлиридә вәзипә өтәватқан сақчи хадимлири, кәнт секретарлири вә мәһәллә имамлиридин игилигән учурлиридин мәлум болушичә, мәзкур кишиләр, даириләр тәрипидин нуқтилиқ көзитилидиған кишиләр тизимликигә елинған болуп, улар вәқә йүз бериштин бир яки бирқанчә күн аввалға қәдәр өз кәнтлиридә нормал иш-тиҗарәтлири билән шуғулланған. Бу әһвални сақчилар уларниң өз һәрикәт пиланлирини йошуруши дәп қарашмақта.

Шахап йезилиқ ислам шөбә җәмийитиниң мудири аблимит қавулни зиярәт

Соал: йилқичидики вәқәгә силәрниң йезидин қанчә киши четишлиқ болуп чиқти?
Җаваб: 8 му, 9 му шундақ.
Соал: улар қайси кәнтләрдин?
Җаваб: 1-, 2- вә 12-кәнтләрдин.

Шахап 12-кәнт мәсчит имамини зиярәт

Соал: силәрниң кәнттин йилқичидики вәқәгә четилғанлар кимләр?
Җаваб: биздин бәрсила четишлиқ болуп чиқти. Исми тохти мамут, 19 яш.
Соал: тохти мамутниң бурунқи әһвал қандақти?
Җаваб: у бултур чопанда иш чиққанда тутулуп сорақ қилинған вә ишқа йүзәки четилған болғачқа тәрбийә берип қоюветилгән.
Соал: у бурун четилған чопандики вәқә немә вәқә иди?
Җаваб: дөләтни ағдурушқа урунған тәшкилат қурған иш. Униң уруқ-туғқанлиридин икки киши шу иш сәвәблик кесилип кәткән.
Соал: тохти мамут немә иш билән шуғуллинатти?
Җаваб: өй безәкчилик билән шуғуллинити.

Шахап 2‏-кәнт партком секретарини зиярәт

Соал: вәқәгә силәрниң кәнттин четилған кимләр?
Җаваб: биздин четилған 4 киши: мәмтимин мамут, 31 яш; аблимит абдукерим 37, яш; мәмәт әмәтнияз, 38 яш; абдураһман туруп, 22 яш.
Соал: булар етилғанлардинму яки тутулғанлардинму?
Җаваб: мәмтимин мамут тутулған; қалғанлири етиветилгән.
Соал: вәқәгә четишлиқ дегән бу гәп гуманму яки муқимлишип болған гәпму?
Җаваб: тәкшүрүлүп ениқлинип болған, бизгә уқтурулди.
Соал: булар адәттә немә ишлар билән шуғуллинатти?
Җаваб: һәммиси деһқан; деһқанчилиқтин сирт вақитлирида яғач, қой тиҗарәтлири билән шуғуллинатти.
Соал: булар вәқә йүз бериштин қанчә күн бурун мушу кәнттә бар иди?
Җаваб: алди 3 күн бурун, бири бир күн аввал кәнттә бар иди.
Соал: уларниң аял, балилири бармиди?
Җаваб: мәмәт әмәтниязниң 3, мәмтимин мамут билән аблимит абдукеримниң 2 дин балиси бар иди.

Шахап йезилиқ сақчихана башлиқини зиярәт

Соал: вәқәгә четилғанлар бурун силәрниң диққитиңларни тартмиғанму?
Җаваб: тартқан. Шуңа булар, нуқтилиқ аилиләр, хизмәт обйекти аилиләр вә хатирҗәмсизлик пәйда қилғучи аилиләр дәп тизимлинип юқириға йолланған.
Соал: тизимға елинишқа сәвәб болған һәрикәтлири немә иди?
Җаваб: өйигә тәкшүрүп барсақ, бүгүн болса әтиси йоқ, әтигини болса кәчтә йоқ. Йүрүш туруши ғәйрий; шуңа изчил назарәт қилинип келиватқан. Мәмтимин мамут роза һейтқа 3 күн қалғучә, таравидин қайтқанларға кавап сатқан. Әслидә у көзимизни бойиған икән.
Соал: йәни улар нормал сода-тиҗарәт қиливатқан болуп, өзиниң әсли һәрикәт пиланлирини йошурған дәмсиз?
Җаваб: шундақ.

Йилқичи йеза 9-кәнт партком секретари турап мәхсутни зиярәт

Соал: вәқәгә силәрниң кәнттин четилған нурахмәт емәй, қанчә яш?
Җаваб: 29 яшларда бар.
Соал: соал немә иш қилатти?
Җаваб: қол трактори бар иди, сеғиз сататти, бәзидә хиш тошуйтти; йеқинда шу сайға йеқин җайдин йәр һөддигә алған икән, шу йәрдә икки еғиз ой салған икән, вәқәгә четилғанлар шу йәрдә бир ишларни қиливатқан икән.

Юқирида йилқичидики вәқәдә етилған вә тутулғанлардин 6 кишиниң кимликлири һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.