Xitayning madriddiki 5 neper banka mes'ulliri qolgha élindi

Ixtiyariy muxbirimiz ekrem
2016-02-18
Share

Xitayning ispaniye paytexti madrid shehiridiki soda - sana'et tarmaq bankisining 5 neper mes'uli qarapul yuyush we baj oghrilash jinayitige chétilip qolgha élin'ghan.

B b s 17 - féwral xewiride bayan qilinishiche, charshenbe küni ispaniye paytexti madriddiki xitay soda - sana'et tarmaq bankisi saqchilarning tuyuqsiz bésip kirip tekshürüshige uchrighan.

Saqchi terepning ashkarilishiche, xitayning bu bankisi jinayi guruhlarning etkes yollar bilen baj oghrilash we ishchilarning heqlirige xilapliq qilish yoli bilen tapqan pullirini pul mu'amile sistémisigha kirgüzüshige yardemleshken. Andin bu pullarni qanuniy yollar bilen xitaygha yötkep ketken. Yötkelgen pulning miqdari 40 milyon yawrogha yetken.

B b s xewiride eskertilishiche, xitayning madriddiki soda - sana'et tarmaq bankisigha tuyuqsiz bésip kirip tekshürüsh xizmitini saqchilar bilen döletning chériklikke qarshi turush - nazaret qilish ishxanisi, teptish organliri birlikte hemkarliship élip barghan. Heriketke yawropa jinayi ishlar saqchi etritimu qatnashqan. Bankining bash diréktorini öz ichige alghan 5 neper emeldari qolgha élin'ghan.

Firansiye awazining 17 - féwraldiki munasiwetlik xewiride tekitlinishiche, madrid saqchiliri 2015 - yili 5 - aydin bashlapla xitaygha munasiwetlik chong bir etkeschilik délosini tekshürüshke kirishken. 30 Neper xitayni etkes mal kirgüzüsh we baj oghrilash gumandari süpitide qolgha alghan. Tekshürüsh netijiside, bu etkes tijarettin kirgen kirimler xitayning madriddiki soda - sana'et tarmaq bankisigha bérip taqalghan. Etkes mal we baj oghrilashtin kirgen bu qarapullarni mushu bankining yuyuwatqan bolush éhtimali körülgen. Eger bu resmiy ispatlansa, yuyulghan pulning miqdari 40 milyon yawro bolidiken. "Yawropol" yeni yawropa jinayi ishlar saqchi teshkilati bu déloning bashqa döletlerdiki xitay bankilirigha chétilghan bolush éhtimalini nezerge élip, bu heqtiki uchurni yawropadiki munasiwetlik organlirigha tarqatqan.

Gérmaniye dolqunlirining 18 - féwraldiki xewiride otturigha qoyulushiche, xitay bayanatchisi xung léy 18 - féwral ipade bildürüp, "Heqiqiy türde qanun'gha tayinip, munasiwetlik mesilini adil bir terep qilishni, ispaniye - xitay karxaniliri we xadimlirining qanunluq hoquqini heqiqiy türde kapaletke ige qilishini, ispaniye - xitay munasiwetlirining yaxshi tereqqiyat yüzlinishini heqiqiy türde qoghdishini telep qilimiz" dégen.

Mezkur xewerde körsitilishiche, xitayning madriddiki bash elchixanisimu 17 - féwral bayanat élan qilip, xitay hökümitining izchil türde chet'ellerdiki xitay meblighi bilen qurulghan karxaniliridin xitay we özi turushluq döletlerning qanun - tüzümlirige ri'aye qilishni, qanunluq tijaret qilishni telep qilip kelgenlikini bayan qilip, "Biz igiligen ehwallargha qarighanda, ispaniyediki xitay iqtisadiy qurulmiliri bu telepni orunlidi" dégen we xitay elchixanisining ispaniye hökümet tereptin bu ishqa munasiwetlik ehwallar toghriliq héchqandaq melumat tapshurup almighanliqini ilgiri sürgen. Biraq, xitay bankisining londonda turushluq bir diréktori bu mesilige inkas bildürüp, bu xildiki qilmishlarning xitay bankilirining chet'eldiki inawitige éghir tesir yetküzidighanliqini tilgha alghan.

Gérmaniyediki Uyghur ziyaliysi ablimit tursun bu xildiki ehwallarning xitayning dölet obrazini yaxshilash siyasiti bilen tetür tanasip bolidighanliqini tilgha aldi.

Firansiye awazining 17 - féwraldiki xewiride eskertishiche, xitayning töt chong bankisining biri bolghan soda - sana'et bankisining madrid tarmiqi 2011 - yili resmiy ish bashlighan.

Xitayning soda - sana'et bankisi asiya qit'esidiki eng chong banka guruhi bolup, pul amanet ishlirida 1 - orunda turidiken. Biraq, gérmaniye dolqunlirining tekitlishiche, xitay bankilirining qarapullarni yuyush we baj oghrilash bilen agahlandurulushi ilgiri köp qétim yüz bergen weqe iken. Téxi ötken yili 6 - ayda italiyening florénsa rayonluq teptish mehkimisi, xitay jinayi guruhlirining junggo bankisi milan tarmiqi arqiliq qachaq meblegh toplawatqanliqini ashkarilighan. 7 - Ayda amérika fédiratsiye amanet bankisimu xitayning qarapullarni yuyush sistémisida kemchilikler barliqini tekitligen.

Yawropa sherqiy türkistan birliki teshkilatining re'isi enwerjan ependimu bu toghrisida öz qarashlirini bildürüp ötti.

Gérmaniye dolqunlirining munasiwetlik xewiride tilgha élinishiche, xitay jinayi guruhliri chet'ellerde tapqan qarapullirini xitay bankiliri arqiliq yuyup, dölet ichige yötkeydiken.

Ötken yili ispaniye saqchiliri xitay adem etkeschiler guruhidin birni pash qilip, 80 neper etkeschi xitayni qolgha alghan. Saqchi terepning ispatlishiche, bu etkeschiler guruhi xitaydin yawropa yaki shimaliy amérika qit'esige bérishni xalaydighan xitay puqraliridin 20 ming yawro pul élip, yalghan pasportlar bilen ularni chégralardin ötküzüsh jinayiti bilen shughullan'ghan.

Ispaniyede jem'iy 191 ming xitay puqrasi yashaydiken. Xitay jinayi guruhlirining ispaniyede pash bolush weqeliri köp qétim yüz bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet