Yekendiki 8-mart weqesidin burun beshkent we kechlik bazarda weqe yüz bergenliki ashkarilandi

Muxbirimiz shöhret hoshur
2015-03-24
Share
yeken-weqesi-abdugheni-turdi.jpg Uyghur isyanchilar teripidin görüge élinip, xitay saqchiliri teripidin qoshup étiwétilgen abdughéni turdi. 2014-Yili may, yeken.
RFA

Mushu ayning 8-küni yekende yüz bergen tagharchi yéziliq qoralliq qisim bashliqi we uning a'ile-tawabi'atini öltürüsh weqesi heqqide muxbirimizning éniqlashliri dawamida, weqedin ikki kün burun, shu weqeni peyda qilghan pida'iylarning yézisi-beshkent bazirida yene bir qanliq weqe yüz bergenliki, 6-mart küni yüz bergen u weqedimu xitay tereptin ikki kishining ölgenliki ashkarilandi.

Yene tagharchi yéziliq qoralliq qisim bashliqigha yan basqanliqi üchün öltürülgen amanliq xadimi barat memetning muqimliq xizmitige mes'ul akisining ashkarilishiche, 8-mart weqesidin 3 ay burun yeni 11-ayning 28-küni yeken kechlik bazarda yene bir chong qanliq weqe yüz bergen. Weqede üch chaqliq motsiklit bilen kechlik bazargha yétip kelgen bir guruppa pida'iylar bazardiki xitay köchmenlirige hujum qilghan. Saqchilar hujumchilarning hemmini neq meydanda étiwetken؛ emma bu weqening tepsilatini hetta muqimliq xadimlirighimu bildürmestin jimjit halda bésiqturuwetken.

Biz 8-mart küni yekende yüz bergen qoralliq qisim bashliqi fang kéjéng we uning a'ile-tawabi'atini öltürüsh weqesi heqqide éniqlash élip bérish jeryanida kütülmigen yene bir uchurgha érishtuq. Melum bolushiche, 8-mart weqesidin 2 kün burun yeni 6-mart küni beshkent baziridimu weqe yüz bérip xitay tereptin ikki kishi ölgen.

Biz 8-mart weqeside qoralliq qisim bashliqigha yan basqanliqi üchün öltürülgen amanliq xadimi barat memetning akisini ziyaret qilish dawamida, mezkur weqedin 3 ay burun, shu tewelikte yeni kechlik bazarda yene bir qanliq weqe yüz bergenlikidin xewer taptuq.

8-Mart küni yeken bazirida yüz bergen tagharchi yéziliq qoralliq qisim bashliqi we uning a'ilisini öltürüsh weqesini peyda qilghan pida'iylarning yekenning beshkent baziridin ikenliki melum, emma beshkentte yüz bergen 6-mart weqesining bu pida'iylar bilen alaqisi bar-yoqluqi hazirche melum emes. 28-Noyabir yeken kechlik bazarda yüz bergen weqening kichik bir weqe emesliki melum, emma weqede ölgen we yarilan'ghanlarning sani éniq emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet