Béyjingda échilghan yighinda Uyghur rayonigha “Ixtisasliq xadim” yötkesh tekitlendi

Yighin'gha béyjing sheherlik partkomning sékrétari lyu chi we Uyghur rayonluq partkom sékrétari jang chünshyenler qatnashqan bolup, lyu chi sözide Uyghur rayonining halqima tereqqiyatini ilgiri sürüsh üchün xitay ölkiliridin köpligen we her sahe “Ixtisasliq xadim” lirining Uyghur rayonigha ewetilishining intayin muhim ehmiyetke ige ikenlikini tekitligen.

U hersahe ixtisasliq xadimlirini xoten wilayitige meslihetchilikke teklip qilish kérek, dep körsetken.

Xitay da'iriliri yéqindin buyan Uyghur élide halqima tereqqiyatni qolgha keltürüsh üchün “Ixtisasliq xadim” teklip qilish herikiti élip bériwatqan idi. Emma chet'ellerdiki közetküchiler buning xitayning Uyghur rayonigha xitay köchmini yötkishining yene bir xil wasitisi ikenlikini ilgiri sürmekte.

Xewerdin melum bolushiche yene, Uyghur rayonining bash sékrétari jang chünshen yighinda aldi bilen béyjingning Uyghur rayonigha qiliwatqan “Xalsi'ene” yardimige teshekkür éytqandin kéyin “Uyghur rayonida aliy mektep püttürgen yashlarni ichkiridiki mekteplerde terbiyilesh xizmiti we shinjangliq sergerdan balilarni panahlandurush xizmitini yaxshi ishlesh Uyghur rayonining muqimliqi we halqima tereqqiyati üchün muhim ehmiyetke ige” dégen.

Uning sözidin melum bolushiche, bundin kéyin béyjingda ishlewatqan shinjangliq ishlemchiler we tijaretchilerni bashqurush xizmitini ikki terep birliship turup ishleydighan bolup, közetküchiler, buning xitayning ichkiridiki Uyghurlarni teqib qélishni kücheytidighanliqidin dérek béridighanliqini bildürmekte.