Ema öktichi chén gu'angching amérika dölet mejlisini ziyaret qildi

U charshenbe küni mejliste her ikki partiyining ezaliri bilen uchrashqan bolup, uni qobul qilghanlar arisida dölet mejlisi bayanatchisi jon bownér, jumhuriyetchiler wekili nensi plosi xanimlar bar.

Birleshme agéntliqining éytishiche, chén gu'angching mejlistiki uchrishishta, xitayning hazir muhim bir burulush nuqtisida turuwatqanliqini bildürüp, amérika we bashqa démokratik ellerni xitayning démokratiye, erkinlik, kishilik hoquq we döletni qanun arqiliq idare qilish basquchigha ötüshige yardem qilishqa chaqirghan.

U shundaqla xitay hökümitigimu xitab qilip, xitay eger xelq'aragha özining semimiylikini körsitimen deydiken, méning jiyenimning dawasini xelq'aragha ochuq-ashkara halda sorisun, dégen.

Shendungluq ema öktichi chén gu'angching xitaydiki bir perzent körüsh siyasitini tenqid qilish bilen közge körün'gen. U bu sewebtin 2006-yili qolgha élinip, 4 yil türmide yatqan. Türmidin chiqqandin kéyinmu bésimdin qutulalmighan chén bu yil 5-ayda amérikining xitaydiki elchixanisigha kiriwalghan. Bir mehel qozghalghan diplomatiyilik jédellerdin kéyin yeni, 20-may küni chén amérikigha oqush sherti bilen yétip kelgen idi. Emma uning a'ilisining bixeterlikige kapaletlik qilidighanliqi heqqide wede bergen xitay da'iriliri chén xitaydin ayrilghandin kéyin, uning jiyeni chén kégüyni qolgha alghan.