Чәтәл әлчихана хадимлири үрүмчигә тәклип қилинди

"5 - Июл үрүмчи вәқәси" қанлиқ бастурулуп бир айдин кейин, йәрлик хитай һөкүмити хитайда турушлуқ бир қисим чәтәл әлчихана хадимлирини уйғур елидә зиярәттә болушқа тәклип қилған болуп, шинхуа агентлиқиниң хәвәр қилишичә, булар уйғур елидә 5 күн зиярәттә болидикән.
Мухбиримиз җүмә
2009.08.10

Хәвәрдә көрситилишичә, уйғур елини зиярәт қилишқа хитайда турушлуқ 26 дөләтниң әлчихана хадимлири тәклип қилинған.

Зиярәт сөһбәт шәклидә елип берилидиған болуп, зиярәтчиләр шу арқилиқ уйғур елиниң тәрәққият әһвали, хитайниң уйғур елигә қаратқан диний сиясити қатарлиқлар билән тонушуп чиқидикән.

Уйғур елигә келидиған әлчихана зиярәт өмикигә, америка, явропа иттипақи, норвегийә вә шветсийә қатарлиқ әлләрдин башқа йәнә, түркийә, сәуди әрәбистан, әрәб бирләшмә хәлипилики, пакистан, малайшия вә қирғизистан қатарлиқ мусулман әллири вә бир қисим африқа әллири әлчиханилириму хадим әвәткән.

Һалбуки хәвәрдә, бу чәтәл әлчихана хадимлириниң үрүмчидә сөһбәт шәклидә уйғур елиниң әһвали билән тонушқандин сирт, мустәқил тәкшүрүш елип баридиғанлиқи яки бармайдиғанлиқи һәққидә тәсилий мәлумат берилмигән.

5 - Июл үрүмчи намайиш бастурулуп, көплигән уйғур яшлири тутуп кетилгәндин кейин, чәтәлләрдә паалийәт елип бериватқан уйғур тәшкилатлири, хәлқара җәмийәтниң үрүмчидә мустәқил тәкшүрүш елип бериши керәкликини тәләп қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.