Шинҗаң гезити җеҗяң өлкисиниң ақсу вилайитигә әқлий җәһәттин ярдәм бәргәнликини хәвәр қилди

Бүгүн шинҗаң гезитидә җеҗяң өлкисиниң “әқлий ярдими” ақсуға күчлүк мәдәт болди мавзулуқ тәпсилий хәвәр берилди.
Мухбиримиз шөһрәт һошур
2011.08.26

Хәвәрдә уйғур райониға аталмиш ярдәм бериш долқуни қозғалғандин буян, җеҗяң өлкисиниң ақсу вилайитигә қилған ярдәмлири санлиқ мәлуматлар билән баян қилинған. Әмма хәвәрниң тәпсилатидин бәкрәк хәвәрниң мавзуси муһаҗирәттики уйғур көзәткүчиләрниң диққитини тартти.

Уйғур көзәткүчиләрниң баян қилишичә, адәттә дуняда әқлий ярдәм аталғуси зеһний аҗизларға яки гөдәкләргә берилгән ярдәмләргә қаритип атилиду.

Бу йәрдә гезитниң бир диққәтсизлик қилғанлиқи вә яки хитай һөкүмитиниң миллий кәмситиш сияситини ялиңач һалда оттуриға қоюп, районға берилгән пән техника җәһәттики ярдәмни әқлий ярдәм дәп атиғанлиқи ениқ әмәс.

Шинҗаң гезитиниң хәвиридә “әқлий ярдәм” аталғуси қош тирнақ ичидә берилгән. Буниңдин қариғанда, мәзкур аталғуниң хитай даирилириниң һөҗҗәтлиридин нәқил елинғанлиқи көрүлмәктә. Әқлий җәһәттики кәмситиш һақарәт характери әң еғир болған кәмситиш түрлиридин болуп, бу дуняда көп қетимлап иҗтимаий тоқунуш вә қанлиқ қирғинчилиқларға сәвәб болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.