Musteqil tetqiqatchi ilham toxti ependining öz yurtigha bérishi cheklendi

Radi'omiz ziyaritini qobul qilghan bu kishining bildürüshiche, ilham toxti ependi uruq - tughqanlirini yoqlash meqsitide, 30 - séntebir öz yurtigha bérish pilan qilghan bolup, bu Uyghur aptonom rayoni da'irilirining sezgürlükini ashurghan.

Hökümet da'iriliri deslepte, ilham toxtining "uruq - tughqanlirigha xewer qilmasliq hemde munasiwetlik kishilerning hemrahliqini qobul qilish" sherti bilen uning öz yurtigha bérishigha qoshulghan.

 Emma, melum waqit ötkendin kéyin, ilham toxtining ishlirigha mes'ul hökümet da'iriliri ayropilan béletlirinimu élip bolghan ilham toxti ependige bügün etigen tuyuqsiz uqturush qilip, bu qétimliq tughqan yoqlash telipining ret qilin'ghanliqini uqturghan.

 Yéqinqi birnechche yildin buyan, ilham toxti ependi "Uyghurbiz" tor békitini qurup, Uyghurlargha munasiwetlik ehwallar we xitay hökümitining Uyghurlargha qaratqan siyasiti heqqidiki teklip pikirliri, tenqidlirinimu bu tor békitide élan qilghan.

 Bultur ürümchide partlighan "5 - iyul ürümchi weqesi" din kéyin, "Uyghurbiz" we "diyarim" qatarliq tor béketliri "qutratquluq qildi" dep eyiblinip taqiwétilgendin kéyin, ilham toxti xitay dölet bixeterlik xadimliri teripidin 1 ay tutup turulghan idi.

Ilham toxti ependi qoyup bérilgendin kéyin, gerche mektepte normal ders ötüshke ruxset qilin'ghan bolsimu, nazaret astigha élinip, uning chet'ellerge chiqishi cheklen'gen. Ilham toxtining bu yil 5 - aydiki türkiyide ötküzülgen ilmiy muhakime yighinigha bérishi cheklen'gen idi.