Хәлқара кәчүрүм тәшкилати җиддий чақириқнамә елан қилип, хитай түрмисидики мәмәт ели розиниң кесәллик сәвәби нәзәргә елинип қоюп берилишини тәләп қилди

Хәлқара кәчүрүм тәшкилатиниң илгири сүрүшичә, қәшқәрдики бир түрмидә тутуп турулуватқан мәмәт ели розиниң саламәтлик әһвали кишини әндишигә салидиған дәриҗигә берип қалған болуп, у һечқандақ давалинишқа еришәлмигән.

Мәмәт ели рози 2009‏-йили 10‏-айда камбоджаға қечип чиққан 22 кишилик уйғур мусапирлириниң қатаридики бири иди. Камбоджа һөкүмити 5"‏-июл вәқәси"дин қечип келип, б д т мусапирлар ишханисидин панаһлиқ тилигән бу уйғурлардин 20 кишини шу йили 12‏-айда хитайға қайтуруп бәргән. Лекин мәмәт ели рози йәнә бир һәмраһи билән қечип кетип, хитайға қайтурулуп берилиштин қутулуп қалған. Лекин у узун өтмәй аяли вә 5 балисини алмақчи болуп, лаосқа барғанда лаос даирилириниң қолиға чүшүп қилип, лаос һөкүмити тәрипидин 2010‏-йили 3‏-айда хитайға өткүзүп берилгән иди.

Хитай һөкүмити уни йүннәнгә қайтуруп келип, меңла наһийисидә бир ай тутуп турған. Андин униң аяли вә 5 балисини ғулҗиға әвәтиветип, өзини қәшқәргә елип барған һәм қәшқәрдики бир түрмигә қамиған иди.

Мәмәт ели розиниң аилә тавабатиниң ашкарилишичә, у бурун қатнаш вәқәсигә учрап билики оператсийә қилинған болуп, униң биликигә селинған төмүр униңға реаксийә қилип, униң саламәтлик әһвалини еғирлаштурувәткән. Хәлқара кәчүрүм тәшкилати бу һәқтики чақириқнамисидә хитай даирилирини уни қоюп беришигә чақирип, униң давалинишиға рухсәт қилишни тәләп қилди.

Бу мәмәт ели розиниң тунҗи қетим түрмидә йетиши әмәс. У бурун бир қетим аталмиш “қанунсиз диний паалийәт” билән шуғулланған дегән җинайәт билән 3 йиллиқ қамақ җазасиға һөкүм қилинип, түрмидә ятқан иди.