Awstraliye köchmenler muzéyida Uyghur tarixiy we medeniyet buyumliri körgezme qiliniwatidu

Mezkur pa'aliyetni awstraliye sherqiy türkistan jem'iyiti uyushturghan bolup, jenubiy awstraliye hökümitining tor bétidiki élanda, “ Bu körgezme kishilerni sherqiy türkistanda yashaydighan Uyghur xelqining jelpkar tarixiy, mol medeniyiti we özgiche örp -adetliri bilen tonushush pursiti bilen temin étidu” dep tekitligen.

6-Iyun küni bashlan'ghan bu körgezmige Uyghurlarning milliy kiyim-kéchekliridin tartip, chalghu eswablirighiche bolghan türlük buyumlar qoyulghan. Bu qétimqi pa'aliyet xitayning bu yilning bashliri Uyghur aptonom rayonluq muqam ansambilini teshkillep, awstraliyide oyun qoyghandin kéyin, awstraliyidiki Uyghurlarning özliri uyushturghan tunji medeniyet pa'aliyiti.

Awstraliye sherqiy türkistan jem'iyiti “5‏-Iyul weqesi” diki qirghinchiliqqa naraziliq bildürüp, muqam ansambilining oyunlirini bayqut qilghan. Awstraliyidiki Uyghurlar “5‏-Iyul weqesi” diki qirghinchiliqqa eng qattiq naraziliq bildürgen muhajirettiki Uyghur jama'etlirining biri idi.

Jenubiy awstraliye hökümitining tor bétidiki élanda yene, ziyaretchilerning bu körgezmide Uyghurlarning ana wetinining tarixiy, Uyghurlarning awstraliyige köchüp kélish hékayisi bilen tonushidighanliqini shundaqla yene, sherqiy türkistanliqlarning köp qutupluq awstraliye jem'iyitige qandaq töhpilerni qoshqanliqidin waqip bolidighanliqini bildürgen.