Mélburn xelq'ara filim féstiwali 'muhebbetning 10 sherti' sewebidin waltéyr söz erkinlik mukapatigha érishti

Bu mukapat mélburn filim féstiwalining 2009‏ - yili xitayning bésimigha bash egmey d u q re'isi rabiye qadir xanimning hayati mezmun qilin'ghan "muhebbetning 10 sherti"ni féstiwalda qoyup, söz erkinlik prinsipida ching turghanliqi üchün bérilgen.

Mélburn xelq'ara filim féstiwali ötken yili 8 ‏ - ayda xitayning telipini ret qilip, "muhebbetning 10 sherti"ni féstiwalda qoyghandin kéyin, xitay féstiwalni bayqut qilip, xitay filimlirini féstiwalgha qatnashturmighan. Bu weqe awstraliyide zor ghulghula qozghap, Uyghur mesilisi xéli künlergiche awstraliye metbu'atlirida küntertiptin chüshmigen idi.

"Azat wiktoriye" teshkilati mezkur mukapatning her yili söz erkinlikige körünerlik töhpe qoshqan shexs we organlargha bérilidighanliqini eskertip, filim féstiwalining bu jehettiki töhpisini nezerde tutup, bu yilqi mukapatning ulargha bérilgenlikini bildürgen.

Woltéyr mukapatining mélburn filim féstiwaligha bérilgenliki élan qilin'ghan shu küni, "muhebbetning 10 sherti" amérikining kolorado shtatidiki téllord shehiride ötküzülgen "tagh filim féstiwali"gha qatnashturuldi.