Nato qisimliri liwiye paytexti tripoligha hawadin qayta hujum qildi
2011.06.22
Hujum netijiside tripolida arqa-arqidin ikki qétim bombardiman awazi yangrighan؛ emma bombardimanning qandaq netije peyda qilghanliqi hazirche melum emes.
Nato qisimliri ötken heptimu tripoligha hawa hujumi élip barghan. Kazafiy hökümiti shu qétimqi hujumda puqralar olturaq rayoni hujumgha uchrap 15 neper puqraning ölgenlikini bildürgen idi.
Nato qomandanliq shtabi bolsa, kazafiyning ahaliler olturaq rayonini urush qomandanliq merkizi qilip paydilan'ghanliqini, shunga puqralar ölgen bolsa, buning mes'uliyitining kazafiy hökümitide ikenlikini bildürgen idi.
Nöwette liwiyining sherqi qismidiki rayonlar asasen isyanchilarning qolida, gherbi qismidiki misrata qatarliq bir qisim muhim port sheherlirimu isyanchilarning kontrolluqida.
Xewerlerde bayan qilinishiche, kazafiy qoshuni rakéta hujumliri arqiliq, misrata shehiridiki isyanchi qoshunning tripoligha qarap ilgirilishining aldini tosmaqta. Liwiyide puqralarning bixeterlikini qoghdashni meqset qilghan nato qisimliri amérika, en'gliye we fransiyining yétekchilikide heriket qilmaqta.
Nato qisimlirining hazirghiche bolghan hujum qétim sani we salmiqidin qarighanda, puqralarning ziyan'gha uchrap qélishidin saqlinish üchün éhtiyatchanliq bilen heriket qiliwatqanliqi we hujumlirini isyanchi qoshun passip ehwalgha chüshüp qalghan chaghlarda élip bériwatqanliqi közge chéliqmaqta.