Обама хитайни хәлқ пулиниң алмаштуруш қиммити мәсилисидә бәргән вәдисидә турушқа чақирди

Канадада 20 дөләт алий дәриҗиликләр учришишиға қатнишиватқан америка президенти барак обама йәкшәнбә күни, хитайни хәлқ пулиниң алмаштуруш қиммити мәсилидә бәргән вәдисидә турушқа чақирди.
Мухбиримиз җүмә
2010.06.28

Франсийә агентлиқиниң нәқил қилишичә, обама мундақ деди: "мән уларниң өзлири җакарлиған сиясәткә җиддий муамилә қилишини үмид қилимән."

20 Дөләт алий дәриҗиликләр учришиши башлиништин бир нәччә күн илгири хитай мәркизий банкиси хитай пулиниң алмаштуруш қиммитини муәййән дәриҗидә өстүрүдиғанлиқини җакарлиған иди.

Мутәхәссисләрниң қаришичә, хитай һөкүмити хәлқ пулиниң алмаштуруш қиммитини қәстән төвән тутуш арқилиқ хәлқарада адаләтсиз базар риқабити яратқан вә хитай маллириниң експорт миқдарини ашурған. Шу сәвәбидин америка -хитай сода алақисида америка тәрәптә нәччә йүз милярд доллар қизил рәқәм көрүнүп кәлмәктә иди.

Обама америкиға мал експорт қилидиған дөләтләргә қаритип мундақ деди: "дунядики һечқандақ бир дөләт өз дөлитиниң гүллиниш йолини америкиға мал експорт қилиш арқилиқ ясаймиз дәп хиял қилмаслиқи керәк. Мән шуни рошән оттуриға қойдумки, биз хизмәт, санаәт вә кәлгүси базарлиримиз үчүн қаттиқ риқабәтлишимиз."

Обама йәнә, дуня иқтисадиниң әслигә келиши алмаштуруш қиммити базар арқилиқ тәңшилидиған пулниң болушини шәрт қилидиғанлиқини илгири сүрди.

Һалбуки хитай даирилири "хәлқ пулиниң алмаштуруш қиммитини өстүрүш дуня иқтисадини әслигә кәлтүрүштә көп рол ойнимайду" дегән мәйданида чиң туруп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.