قىرىم تاتارلىرى خىتايغا قارشى نامايىش ئۆتكۈزدى

قىرىم تاتارلىرى ئۇكرائىنىيىدىكى خىتاي ئەلچىلىكىنىڭ ئالدىدا نامايىش ئۆتكۈزۈپ خىتاي ھۆكۈمىتىنى گۇناھسىز پۇقرالارنى ئۆلتۈرۈش بىلەن ئەيىبلىدى. بۇ نامايىشنى ئۇيۇشتۇرغان تاتار مىللىي مەجلىسى باياننامە ئېلان قىلىپ، خىتاي ھۆكۈمىتىنىڭ ئۇيغۇرلارغا تۈرلۈك ئۇسۇللار ئارقىلىق بېسىم يۈرگۈزۈپ كېلىۋاتقانلىقىنى، بۇنىڭغا چىدىماي كوچىلارغا چىققان خەلقنى بولسا تولۇق قوراللانغان ئەسكەرلەر بىلەن قانلىق باستۇرۇش ئارقىلىق ئۆز پۇقرالىرىغا جەڭ ئېلان قىلغانلىقىنى ئېيىتتى.
ﻣﯘﺧﺒﯩﺮﯨﻤﯩﺰ ﺋﯩﺮﺍﺩﻩ
2009-07-23
Share

ئۇلار باياننامىدە يەنە، خىتايلارنىڭ ئۇيغۇرلارغا يۈرگۈزۈۋاتقان سىياسىتىنىڭ ئىرقىي قىرغىنچىلىقتىن باشقا نەرسە ئەمەسلىكىنى ئىپادە قىلىپ:" دۇنيا مەدەنىيىتگە زور تۆھپە قوشقان بىر مىللەتنىڭ خىتايلار تەرىپىدىن يوقىتىلىشىغا قاراپ تۇرۇشقا بولمايدۇ" دېدى.

قىرىم تاتار مىللىي مەجلىسىنىڭ باياننامىسىدە مۇنداق دەپ يېزىلغان : "تاتار مىللىي مەجلىسى ئۇيغۇرلار بىلەن خىتايلارنىڭ ئەمدى بىر يەردە ياشىشى مۇمكىن ئەمەس، دەپ قارايدۇ ۋە دۇنيا جامائەتچىلىكىدىن شەرقىي تۈركىستاننىڭ مۇستەقىللىقىنى ئېتىراپ قىلىشىنى تەلەپ قىلىدۇ. بىز بۇ تەلەپنى ئالدى بىلەن تۈركىي جۇمھۇرىيەتلەر ۋە پۈتۈن مۇسۇلمان دۆلەتلىرىدىن تەلەپ قىلىمىز. چۈنكى تۈرك ۋە مۇسۇلمان بولغان ئۇيغۇرلار بۇددىست ۋە كوممۇنىست خىتايلار تەرىپىدىن يوقىتىلىۋاتىدۇ. ئۇلارنىڭ بۇ پاجىئەسىدىن ھەممىمىز تارىخ ئالدىدا جاۋابكار!"

قىرىم تاتار مىللىي مەجلىسى ئانا يۇرتلىرى قىرىم بولغان تاتارلارنىڭ ئەڭ ئالىي ۋەكىل خاراكتېرلىك ئورگىنى بولۇپ، 1991 - يىلى ئىيۇندا قۇرۇلغان. بۇ ئورگان ئۇكرائىنىيە مەركىزى ھۆكۈمىتىدە، قىرىم ئاپتونوم ھۆكۈمىتىدە ۋە خەلقئارادا قىرىم تاتارلىرىغا ۋەكىللىك قىلماقتا. 
پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت