خىتاي ئۆلكىلىرىگە يۆتكەلگەن ئەمگەكچىلەر سانى 240 مىڭغا يەتكەن

خىتاي دائىرىلىرىنىڭ دۈشەنبە كۈنى ئېلان قىلغان ئاق تاشلىق كىتابىدا ئوتتۇرىغا قويۇلۇشىچە، 2008 - يىلى ئۇيغۇر ئېلىدىن خىتاي ئۆلكىلىرىگە يۆتكەلگەن ئەمگەكچىلەر سانى 240 مىڭغا يەتكۈزۈلگەن.
ﻣﯘﺧﺒﯩﺮﯨﻤﯩﺰ ﺟﯜﻣﻪ
2009-09-21
Share

شىنخۇئا ئاگېنتلىقىنىڭ خەۋەر قىلىشىچە، بۇ ھەقتىكى مەلۇماتلار مەزكۇر كىتابنىڭ "شىنجاڭدىكى تەرەققىيات ۋە يۈكسىلىش" ناملىق قىسمىدا ئوتتۇرىغا قويۇلغان. كىتابتا بۇلار خىتايدىكى پۇقرالارنىڭ شەھەر ئاتلاپ ئولتۇراقلىشىش ۋە خىزمەت قىلىشى ئەركىنلىكى سۈپىتىدە كۆرسىتىلگەن بولسىمۇ، ئەمما ئۇيغۇر دېھقان ئەمگەكچىلىرىنىڭ خىتاي ئۆلكىلىرىگە پىلانلىق يۆتكەلگەنلىكى ھەققىدە توختىلىنمىغان.

2004 - يىلىدىن بۇيان خىتاي يەرلىك ھۆكۈمىتى ئۇيغۇر ئېلىدە " ئەمەك كۈچلىرىنى سىرتلارغا يۆتكەش سىياسىتى"نى كۈچەيتىپ ئېلىپ بارغان ۋە ئاساسلىقى ئۇيغۇر قىزلىرىدىن تەشكىللىگەن ئىشلەمچىلەر قوشۇنىنى خىتاينىڭ دېڭىز بويى رايونلىرىدىكى زاۋۇتلارغا يۆتكىگەن ئىدى.

بىز ئىگىلىگەن خەۋەرلەر ۋە رادىئومىزغا كەلگەن مەلۇماتلارغا قارىغاندا، ئۇيغۇر ئېلىدىن خىتاي ئۆلكىلىرىگە يۆتكەلگەن ئەمگەكچىلەر خىتاي زاۋۇتلىرىدا ھەر خىل دەپسەندىچىلىكلىرىگە دۇچ كەلگەن. نەتىجىدە مەزكۇر سىياسەت ئۇيغۇرلار ئارىسىدا نارازىلىق قوزغىغان. ئۇيغۇر سىياسىي پائالىيەتچىلەر " 5 - ئىيۇل ئۈرۈمچى نامايىشى"نىڭ سەۋەبلىرىنىڭ بىرىنىڭ خىتاينىڭ ئۇيغۇر ئېلىدە يۈرگۈزگەن "ئەمەك كۈچلىرىنى سىرتلارغا يۆتكەش سىياسىتى" ئىكەنلىكىنى ئوتتۇرىغا قويۇشماقتا.

26 - ئىيۇل شاۋگۇەن شەھىرىدىكى بىر ئويۇنچۇق زاۋۇتىدىكى توقۇنۇشتا خىتايلار ئىككى ئۇيغۇرنى ئۆلتۈرگەن بولۇپ، نەتىجىدە بۇ 5 - ئىيۇل ئۈرۈمچى نامايىشىغا سەۋەب بولغان ئامىللارنىڭ بىرىگە ئايلانغان ئىدى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت