“хитай шәһәрлиридин қайтуруп әкәлгән уйғур сәргәрдан балилар өзини өйгә қайтқандәк һес қилмиди”

Уйғур аптоном район даирилири 2011-йили ичидә хитай шәһәрлиридә сәргәрдан болуп йүргән балиларни қайтуруп келиш һәрикитини қозғап, җәмий 800 гә йеқин балини қайтуруп әкәлгән иди. Әмма, ичкиридин қайтуруп келингән сәргәрдан балилар ата-анилириға тапшуруп берилгән болсиму, бу балиларниң ата-анилириниң көпи йиллиқ кирими 5000 йүәнгиму йәтмәйдиған намрат аилиләр болғачқа, җан һәләкчиликидә алдираш йүргән бу ата-анилар балилирини орунлаштурушқа амалсиз қелип, нәтиҗидә, бу балилар мәйли психика җәһәттә болсун, мәйли башқа җәһәтләрдә болсун йәнила өзини өйгә қайтқандәк һес қилмиған.

Аптоном районлуқ аяллар бирләшмиси өйигә қайтурулған сәргәрдан балилар үстидин тәкшүрүш елип барғандин кейин юқиридики хуласини чиқарған болуп, улар бу мәсилини үрүмчидә ечиливатқан уйғур районлуқ хәлқ қурултийиниң 2-омумйиғинида оттуриға қоюп, һөкүмәттин бу һәқтә тәдбир елишни тәләп қилған.

Аптоном районниң рәиси нур бәкри техи йеқинда елан қилған чағанлиқ тәбрик сөзидә, сәргәрдан балиларни қайтуруп келишни 2011-йили ичидә һөкүмәт ишлигән әң муһим хизмәтләрниң бири, дәп мәдһийилигән иди.

Дуня уйғур қурултийи әйни чағда бәргән баянатида, мәсилиниң бу балиларни қайтуруп әкелиш биләнла аяғлашмайдиғанлиқини, әсли мәсулийәтниң бундин кейин башлинидиғанлиқини әскәртип: балиларниң сәргәрдан болушиға сәвәб болуватқан түп амилниң хитай һөкүмитиниң районда йүргүзүватқан сиясити икәнликини билдүргән иди.