Хитай даирилири уйғур сәргәрдан балиларни юртиға қайтуруп келиш һәрикитиниң вақти узартти

Хитай сақчи даирилири өткән йили 4-айдин башлап адәм әткәсчилири тәрипидин хитайниң ичкири өлкилиригә елип берилип, мәҗбури оғрилиққа селинған сәргәрдан уйғур балиларни юртиға қайтуруп келиш һәрикити башлиған. Даириләр һазирға қәдәр 1624 нәпәр балиниң қайтуруп келингәнликини елан қилған.

Даириләр бу һәрикәтни әсли 2011‏-йилниң ахирлириға қәдәр елип беришни пиланлиған. Бирақ, уйғур аптоном районлуқ җ х назарити әмәлдарлириниң ашкарилишичә, хитай җ х министирлиқи қайтуруп келиш һәрикитини бу йил 5‏-айға қәдәр узартишқа мақул болған.

Һалбуки, чәтәлдики уйғур тәшкилатлири мәзкур һәрикәтниң тәшвиқат үчүн елип бериливатқанлиқини әскәртип, һазирға қәдәр қайтуруп келингән балилар ичкиридики сәргәрдан балиларниң интайин аз бир қисмидин ибарәт икәнликини илгири сүрмәктә.

Толуқсиз мәлуматларда илгири сүрүлүшичә, ичкиридики сәргәрдан балиларниң сани 20 миңдин ешиши мумкин. Уйғур аптоном районлуқ аяллар бирләшмиси йеқинда қайтуруп келингән балиларни орунлаштуруш мәсилисиниң қийинчилиққа учриғанлиқини билдүргән иди.

Җ х назаритиниң җав фамилилик бир әмәлдариниң билдүрүшичә, 2011‏-йилдики һәрикәттә 1630 нәпәр гумандар қолға елинған, 227 җинайәт гуруһ паш қилинған.