Сичуәндә өзини көйдүргән тибәт раһипни хитай сақчилири оққа тутти

Сичуән аба тибәт аптоном областидики кирти ибадәтханисиниң алдида, бир тибәт раһиб өзини көйдүргәндә, хитай сақчилири уни оққа тутқан.
Мухбиримиз вәли
2009-02-28
Share

Бирләш агентлиқиниң баян қилишичә, бу вәқә тибәтләрниң йеңи йил байримида елип баридиған әнәнивий - дини паалийәтлири хитай һөкүмити тәрипидин чәкләнгәнликигә қарши қозғалған намайиштин кейин йүз бәргән.

Сүргүндики тибәт даирилириниң баян қилишичә, 2 ‏ - айниң 27 ‏ - күни сичуән аба тибәт областида бир қисим раһиблар керти ибадәтханисиниң алдиға топлинип, хитай һөкүмитиниң тибәтләрниң йеңи байримида елип баридиған әнәнивий дини паалийәтлири қаттиқ чәкләнгәнликигә қарита наразилиқ билдүргән.

Яшанған ламаларниң нәсиһәтлири билән намайишчилар тарқилишқа башлиғандин кейин, 20 яшлар чамисидики бир яш раһиб ибадәтхана алдиға келип, тибәтләрниң қарлиқ тағдики шир бәлгилик мустәқиллиқ байриқини вә далай ламаниң рәсимини көтүрүп туруп өзигә от қойған. Хитай сақчилири өзигә от яққан раһибқа қаритип үч пай оқ атқан.

Хитайниң 'шинхуа агентлиқи' бу вәқәни, өзини көйдүргән тибәтни сақчилар дохтурханиға апирип қутқузушқа тиришти, дәп хәвәр қилди. Әмма өзигә от қойған кишиниң раһиб икәнликини, вәқәниң сәвәбини, һәм хитай сақчилири уни оққа тутқанлиқини тилға алмиди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт