سۈرىيە تاشقى ئىشلار باياناتچىسى جىھاد ماقدىسسى سۈرىيىدىن غايىب بولدى

سۈرىيىدىكى ئىسيانچىلار ئۇنىڭ، ئەساد ھاكىمىيىتىدىن يۈز ئۆرۈگەنلىكىنى بىلدۈرسە، يەنە بەزى مەنبەلەر، ئۇنىڭ بايانات بەرگەندە ھۆكۈمەت بەلگىلىگەن سىزىقتىن چەتنەپ كەتكەنلىكى ئۈچۈن ۋەزىپىسىدىن ئېلىپ تاشلانغانلىقىنى ئوتتۇرىغا قويماقتا. لىۋاننىڭ ئەلمانار تېلېۋىزىيىسىنىڭ خەۋەر قىلىشىچە، جىھاد ماقدىسسى يېقىندا ئائىلىسى بىلەن بىرلىكتە سۈرىيىدىن ئايرىلىپ، ئاۋۋال بۇيرۇتقا كەلگەن، ئۇنىڭدىن كېيىن لوندونغا سەپەر قىلغان.

نۆۋەتتە بەزى مەنبەلەر، ماقدىسسىنىڭ سىياسىي مەيدان جەھەتتە ئىسيانچىلار تەرەپكە ئۆتكەنلىكىنى ئىلگىرى سۈرۈشمەكتە.

بۇ ھەقتە، تۈركىيىنىڭ دۇنيا بۇلتەنى گېزىتىگە پوزىتسىيە بىلدۈرگەن ئىسيانچىلار سېپىنىڭ بىر باشلىقى، ماقدىسسىنىڭ بۇرۇن قىلغان سۆزلىرى سەۋەبلىك، ئۇ مەيدانىنى ئۆزگەرتكەن تەقدىردىمۇ، خەلقنى تەسىرلەندۈرەلمەيدىغانلىقىنى بايان قىلغان. مەلۇم بولۇشىچە، ماقدىسسى بايانات بېرىش جەريانىدا «بىز خىمىيىۋى قوراللىرىمىزنى ئۆز خەلقىمىزگە قارىتا ئىشلەتمەيمىز» دېيىش ئارقىلىق، سۈرىيىنىڭ خىمىيىۋى قوراللارغا ساھىب ئىكەنلىكىنى رەسمىي شەكىلدە ئاشكارىلاپ قويغان.