Тәйвән президенти ма йиңҗу: 'рабийә қадир террорчи әмәс'

Тәйвән президенти ма йиңҗу җүмә күни тәйвән - хитай билән мунасивәтлиригә даир муһим бир йиғинға қатнашқанда тәйвәнниң "аппел күндилик хәвәрләр гезити"ниң бир мухбири униңдин "уйғурларниң рәһбири рабийә қадир ханим террорчиму, дәп соал қойған. Ма йиңҗу бу соалға "яқ, у террорчи әмәс," дәп җаваб бәргән. Әмма бу һәқтә көп сөзләштин өзини тартқан.
Мухбиримиз ирадә
2009.10.23

Тәйвәндики бир қисим аммиви тәшкилатларниң рабийә ханимни 11 - айда тәйвәнгә тәклип қилиши билән башланған бу дәвада, узун талаш - тартишлардин кейин, тәйвән ички ишлар министири җяң йихуа дуня уйғур қурултийиниң рәиси рабийә қадир ханимға виза берилмәйдиғанлиқини рәсмий елан қилған вә буниң сәвәбини дөләт бихәтәрлики вә җәмийәт тәртипини көздә тутуш дәп изаһлиған иди. Улар һәм дуня уйғур қурултийиниң икки террорчи тәшкилат билән алақиси барлиқини илгири сүргән иди.

Рабийә қадир ханим болса тәйвән даирилириниң бу әйиблишини кәскин рәт қилип, әгәр тәйвән һөкүмити әпу соримиса, тәйвән һөкүмити үстидин әрз қилидиғанлиқини җакарлиған иди. Буниң билән тәйвән тәрәп, "тәйвән һөкүмити һечқачан рабийә қадир ханимни террорчи демиди, у рәһбәрлик қиливатқан дуня уйғур қурултийиниму террорчи тәшкилат демиди" дәп изаһат бәргән иди.

Әмма рабийә қадир ханим болса, тәйвән тәрәпниң хитайниң бесими түпәйли өзигә виза бәрмигәнликини илгири сүрүп тәйвән һөкүмитини демократик болмаслиқ билән әйиблигән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.