5‏-Iyulgha weqesige munasiwetlik délolargha mes'ul tursun bextining tuyuqsiz ölümi guman qozghidi

Ürümchi sheherlik j x idarisining erziyet ishlirigha mes'ul xadimi tursun bekrining yéqinda tuyuqsiz ölüp kétishi ürümchide zor ghulghula qozghap, uning ölüm sewebi guman peyda qilghan.
Muxbirimiz erkin
2012.06.15

Gerche héchqandaq pakit bolmisimu, lékin uning ölümidin guman qilghuchilar tursun bextining “5-Iyul weqesi” de iz-déreksiz yoqap ketken Uyghurlarni sürüshtürüp, xitay amanliq organlirining ghezipini qozghap qoyghan bolushi éhtimalgha yéqin, dep qaraydiken.

Ürümchi sheherlik saqchi idarisidiki xadimlarning ashkarilishiche, u tamaka‏, haraq ichmisimu we héchqandaq késili bolmisimu, biraq buningdin 3 hepte ilgiri özi olturushluq a'ililikler qorusidiki pelempeydin chiqiwétip shu jayda yiqilip jan üzgen.

Bu xitay amanliq organlirigha ishleydighan Uyghur kadirlardin tuyuqsiz ölüp qélip, Uyghur jem'iyitide ölüsh sewebi “5-Iyul weqesi” ge munasiwetlik, dep guman qozghighan 2‏-kishi. Ötken yili aptonom rayonluq dölet bixeterlik nazaritining gheyret isimlik bir kadirimu tuyuqsiz ölüp kétip, Uyghur jem'iyitide her xil gumanlarni qozghighan. Gheyretning 5‏-iyulda xitay amanliq küchlirining Uyghur tutqunlirigha qilghan bezi jinayetlirini ashkarilap qoyghanliqtin zeherlep öltürülgenliki ilgiri sürülgen idi.

Tursun bextining ölüp ketkinige 3 heptidin éship qalghan bolsimu, biraq da'iriler we a'ilisi uning néme sewebtin ölüp qalghanliqigha héchqandaq chüshenche bérip baqmighan. Tursun bexti ilgiri tengri tagh rayonluq j x idariside xizmet qilatti. “5-Iyul weqesi” din kéyin, sheherlik j x idarisige yötkep apirilip weqede iz-déreksiz yoqap ketkenlerni tizimlash ishlirigha qoyulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.