Xitay Uyghur imamlarni bu jüme xutbiside partiye qurulghanliqining 90 yilliqini xatirileshke buyrudi

Dunya Uyghur qurultiyining ilgiri sürüshiche, bu munasiwet bilen da'iriler Uyghur élidiki her qaysi meschitlerge uqturush chüshürüp, meschit imamliridin jüme xutbiside partiye qurulghanliqining 90 yilliqini tebriklep, partiyining milletler siyasitini medhiyilep xutbe oqushni telep qilghan.

Dunya Uyghur qurultiyi bayanatchisi dilshat rishit, 1‏-iyuldiki jüme namizida partiye siyasitini medhiyilep xutbe oqush-oqumasliq imamlarning “Wetenperwerliki” ni sinaydighan ölchem qilip békitilgenlikini eskertip, medhiye xutbisi oqushni ret qilghanlarning imamliqi élip tashlinip, memuri we qanuni chare körülidighanliqi agahlandurulghanliqini bildürgen.

Dilshat rishit, xitay da'irilirining diniy sorunlarni siyasiy teshwiqat meydanigha aylanduruwatqanliqini tenqidlep, Uyghurlarning diniy étiqadi suyi'istémal qiliniwatqanliqini ilgiri sürgen.

Xitayning Uyghur diniy ölimaliridin her jüme xutbiliride we héyt namazlirida partiyining milletler siyasitini küyleshni telep qilishi yéqinqi yillardin béri izchil otturigha qoyup kéliwatqan teleplirining biri. Lékin bu jümening partiye qurulghan 1‏-iyul bilen oxshash kün'ge toghra kélip qélishi we buninggha atap xutbe oqushni telep qilishi tunji qéqimliqtur.

Xitay da'iriliri 7‏-ayning 1‏-küni partiye qurulghanliqining 90 yilliqini daghdughiliq ötküzüshke xélidin béri teyyarliq qilip kéliwatqan idi.