Җеҗяңда такси шопурлири, хенәндә нефит ишчилири иш ташлиди

Өткән һәптә җеҗяңниң хаңҗу шәһиридики 1500 дин артуқ такси шопури уда 3 күн иш ташлап намайиш қилип, мал баһасиниң өсүшигә әгишип май баһасиниң өрлигәнликини, әмма такси шопурлириниң тапавити өсмигәнлики, һөкүмәт әмәлдарлирида болса парихорлуқниң күчәйгәнлики үстидин шикайәт қилған иди.

Шинхуа агентлиқи қатарлиқ һөкүмәт мәтбуатлири  һөкүмәт даирилири такси шопурлириға толуқлима ярдәм пули беридиғанлиқини билдүргәндин кейин бу һәптә, хаңҗуда такси шопурлири ишқа чүшкәнликини хәвәр қилған иди. Әмма ройтерс агентлиқиниң бүгүн бейҗиңдин хәвәр қилишичә, 9-авғуст сәйшәнбә күни йәнә 1000 ға йеқин такси шопури хаңҗуда намайишни давамлаштурған.

Охшаш бир күндә йәни 9-авғуст  1000 ға йеқин хенәнлик нефит ишчиси, маашини өстүрүп бериш, парихор әмәлдарларни җазалашни тәләп қилип, җеңҗу шәһиридә намайиш қилған.

Мәлум болушичә,  хенән нефит ишчилириниң бу қетимқи наразилиқ намайишиға, нефит ширкити башлиқлири һәм ишхана хизмәтчилириниң айлиқ маашиниң ишчиларниң маашидин нәччә һәссә юқирилиқи,  әмма  мал баһаси юқирилиған шараитта ишчиларниң маашиниң өстүрүп берилмигәнлики сәвәб болған.