خىتاي تاماكىلىرىدا يۇقىرى مىقداردا قوغۇشۇن بايقالغان

خىتايدا ئىشلەپچىقىرىلغان بىر قىسىم تاماكىلاردا يۇقىرى مىقداردا قوغۇشۇن، ئارسېن ۋە كادمىي قاتارلىق مېتاللار بايقالغان. رويتېرسنىڭ خەۋەر قىلىشىچە، كانادالىق تەتقىقاتچىلار خىتاي تاماكىلىرى ئۈستىدە تەكشۈرۈش ئېلىپ بارغان بولۇپ، ئۇلار خىتاي ۋە كانادا تاماكىلىرىنى سېلىشتۇرۇش ئارقىلىق ئېرىشكەن تەتقىقات نەتىجىسىنى"تاماكا چەكلەش" ژۇرنىلىدا ئېلان قىلغان.
مۇخبىرىمىز ﺋﯩﺮﺍﺩﻩ
2010.10.07

ئۇنىڭدا يېزىلىشىچە، خىتاي تاماكىلىرىدا ئادەم سالامەتلىكىگە ئىنتايىن زىيانلىق بولغان قوغۇشۇن، ئارسېن قاتارلىق ماددىلارنىڭ مقىدارى زىيادە يۇقىرى بولۇپ، كانادادا ئىشلەپچىقىرىلغان تاماكىدىن 3 ھەسسە يۇقىرى چىققان.

تەتقىقاتچىلار بۇ ھەقتە ئېلان قىلغان ماقالىسىدە خىتاي تاماكىلىرىدا بايقالغان زەھەرلىك ماددىلارنىڭ تەركىبىنىڭ كىشىنى چۆچۈتىدىغان دەرىجىدە يۇقىرى بولۇشى خىتايدىكى تاماكا چەككۈچىلەر ۋە خىتاي تاماكىلىرىنى ئىمپورت قىلىدىغان دۆلەتلەردىكى چەككۈچىلەر ئۈچۈن جىددىي بىر تەھدىت پەيدا قىلىۋاتقانلىقىنى بىلدۈرگەن.

خىتايدا 320 مىليوندىن ئارتۇق تاماكا ئىستىمالچىسى بار بولۇپ، ھەر يىلى بىر مىليوندىن ئارتۇق كىشى تاماكىغا مۇناسىۋەتلىك كېسەللىكلەر سەۋەبىدىن ھاياتىدىن ئايرىلىدىكەن. خىتايدىكى تاماكا چېكىدىغانلارنىڭ سانى دۇنيا بويىچە بىرىنچى ئورۇندا تۇرىدۇ. خىتاي ھەم شۇنداقلا دۇنيادىكى ئاساسلىق تاماكا ئىشلەپچىقارغۇچى دۆلەتلەرنىڭ بىرى. خەۋەردە كۆرسىتىلىشىچە، 2007 - يىلى خىتايدا 2 تىرليون تالدىن ئارتۇق تاماكا ئىشلەپچىقىرىلغان.

ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭ
قىسقا خەۋەرلەر
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.