Хитай пиланлиқ туғут сияситидә өзгириш болмайдиғанлиқини елан қилди

Бүгүн хитай даирилири пиланлиқ туғут сияситини давамлиқ иҗра қилидиғанлиқини елан қилди. Бирләшмә агентлиқиниң хәвәр қилишичә, хитайда пиланлиқ туғут сиясити йолға қоюлғиниға 30 йил тошқан мәзгилдә, бу сиясәт һәққидә бәзи муназириләр башланған иди.
Мухбиримиз ирадә
2010.09.27
Share on WhatsApp
Share on WhatsApp

Болупму, мәзкур сиясәтниң хитайда қиз - аяллар саниниң кемийип кетиши вә нопусниң қерилишип кетишидәк ақивәтләрни кәлтүрүп чиқарғанлиқи хитай тор бәтлиридә мулаһизә қилинишқа башлиған.
 
Хитайдики бәзи ахбарат васитилири һөкүмәтниң пиланлиқ туғут сияситидә қайта ойлинип, өзгәртиш елип бериши мумкинликини хәвәр қилған иди.

Бүгүн, "хитай гезити" елан қилған хәвәрдин мәлум болушичә, хитай дөләтлик нопус вә пиланлиқ туғут комитети башлиқи ли бин бу һәқтә тохтилип, пиланлиқ туғут сияситидә өзгириш болмайдиғанлиқини елан қилған. У, "бундақ чоң тарихи қарар үстидә өзгәртиш елип бериш ундақ асанға тохтимайду. Бу сиясәт йәнә нәччә он йил давам қилиду" дегән.

Дуня уйғур қурултийи баянатчиси дилшат ришит әпәнди болса бу һәқтә радиомизға баянат берип, уйғурларниң хитайдики пиланлиқ туғут сияситиниң зийиниға әң көп учраватқан хәлқ икәнликини билдүрди.

У, хитайда йолға қоюлуватқан бу сиясәтни әслидила аз санда болған уйғурларға охшаш йолға қоюшниң интайин орунсиз икәнликини, бу сиясәтниң уйғурларға мәйли иҗтимаий, мәдәний вә мәйли диний җәһәттин болсун баб кәлмәйдиғанлиқини ейтти.

Дилшат ришит сөзидә йәнә, хитай һөкүмитиниң уйғур райониға еқип кириватқан хитай нопусини контрол қилмайдиғанлиқини әскәртип, аталмиш пиланлиқ туғут сияситиниң әмәлийәттә хитай һөкүмитиниң уйғурларни ассимилятсийә қилиш сияситини иҗра қилиштики муһим васитиси икәнликини билдүрди.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт