Уйғур елиниң партком секретари җаң чүншйән '3 хил күчләр' гә қаттиқ зәр беришни тәкитлигән

Уйғур елиниң партком секретари җаң чүншйән 6 - май аптоном райониниң һәр дәриҗилик органлири вә уйғур елидә турушлуқ һәрбий қисим қоманданлиқ штабини көздин кәчүрүп, муқимлиқни сақлаш вә "3 хил күчләр" гә қаттиқ зәр беришни тәкитлигән.
Мухбиримиз җумә
2010-05-08
Елхәт
Пикир
Share
Принт

Җаң чүншйән, 6 - май уйғур аптоном районлуқ сиясий кеңәшкә берип, йеқинда хитай мәркизий һөкүмити ачидиған " шинҗаң хизмити йиғинини" ни күтүвелиш вә йиғин роһини әмәлийләштүрүш тоғрисида орунлаштуруш елип барған.

У сиясий кеңәштә йәнә, хәлқниң турмуш сәвийисини өстүрүш вә милләтләр иттипақлиқини илгири сүрүш тоғрисида тохталған.

Җаң чүншйән 6 - май йәнә, уйғур елидә турушлуқ хитай һәрбий қисимлирини көздин кәчүргән. У, уйғур елидики һәрбий қисимларниң мәркәз вә уйғур аптоном райониниң муһим орунлаштурушлириға бойсунуп кәлгәнликини тилға алған. У йәнә, һәрбий қисимларниң "5 - июл вәқәси" ни тинчитишта "сиясий мәйдани мустәһкәм, түзүмгә бойсунушта қаттиқ, һәрикити кәскин" болғанлиқиға алаһидә юқири баһа бәргән.

Җаң чүншйән: "шинҗаңниң земини кәң, байлиқи мол. У вәтинимизниң ғәрбидики бир гөһәр земин. Шинҗаң дөлитимизниң әң муһим енергийә базиси, ғәрбкә қарап тәрәққий қилиштики көврүк истиһками, шундақла дөлитимизниң ғәрбий шималидики истратегийилик тосуқ вә истратегийилик муһим җай" дегән.

У уйғур елидики һәрбий қисимлардин "муқимлиқ һәммидин әла" дегән роһни турғузуп, "шинҗаңниң муқимлиқ хизмитини мәркәз қилған асаста "3 хил күчләргә" изчил юқири бесим билән қарши турушни бошатмаслиқ" ни тәләп қилған.

Җаң чүншйән 24 - апрел уйғур елигә тәйинләнгән. Униң хәлқчил вә демократик идийигә игә рәһбәр икәнликини илгири сүрүлгән иди. Һалбуки, җаңниң юқирида қилған сөзлири ваң лечүән дәвридикидин алаһидә пәрқләнмәйдиғандәк қилатти.

Пикирләр (0)
Share
Толуқ бәт