خىتاي ھۆكۈمىتى، زەھەرلىك سۈت پاراشوكى مەسىلىسى تۈپەيلىدىن خەلقىنىڭ ئىشەنچىسىنى قايتىدىن قولغا كەلتۈرۈش ئۈچۈن جىددىي ھەرىكەت باشلىغان

خىتاي ھۆكۈمىتى، زەھەرلىك بالىلار سۈت پاراشوكى مەسىلىسى تۈپەيلىدىن ھۆكۈمەتكە بولغان ئىشەنچىسىنى يوقاتقان خەلقىنىڭ ئىشەنچىسىنى قايتىدىن قولغا كەلتۈرۈش ئۈچۈن جىددىي ھەرىكەت باشلىغان.
مۇخبىرىمىز ئۆمەر قانات
2008-09-20
ئېلخەت
پىكىر
Share
پرىنت

 سەنلۇ ماركىلىق بالىلار سۈت پاراشوكىدا بىر خىل زەھەرلىك خىمىيىلىك ماددىنىڭ ئوتتۇرىغا چىقىشى بىلەن باشلانغان كرىزىسنىڭ دائىرىسى كۈنسىرى كېڭىيىپ خەلقنىڭ خىتايدىكى سۈت مەھسۇلاتلىرىغا بولغان ئىشەنچىسىنىڭ يوقىلىشىغا ۋە نۇرغۇنلىغان سۈت مەھسۇلاتلىرىنىڭ يىغىۋېلىنىشىغا سەۋەب بولغان ئىدى.

خىتاي سەھىيە مىنىستىرلىكى خىتايدىكى پۈتۈن ئۆلكە ۋە چوڭ شەھەرلىك ھۆكۈمەتلەرگە 24 سائەت خىزمەت قىلىدىغان خىزمەت ئەترەتلىرى قۇرۇپ خەلقىنىڭ ياردەم تەلەپلىرىگە ۋاقتىدا جاۋاپ بېرىش توغرىسىدا جىددىي بۇيرۇق چۈشۈرگەن.

خەۋەرلەرگە قارىغاندا، جۈمە كۈنى ئاخشىمى خىتاي دۆلەت كابىنىتى تەرىپىدىن چۈشۈرۈلگەن ئۇقتۇرۇش، دوختۇرخانىلارنىڭ كېسەللەرنى پۇلسىز داۋالايدىغانلىقى قاتارلىق، ھۆكۈمەت مەسىلىگە ناھايىتى جىددىي قاراۋاتقانلىقىنى ۋە خەلقنىڭ ۋەزىيىتىگە كۆڭۈل بۆلۈۋاتقانلىقىنى كۆرسىتىدىغان بىر قاتار تەدبىرلەرنى ئۆز ئىچىگە ئالىدىكەن.

بۇ ئارىدا خىتاي مەتبۇئاتى ۋە ئاخبارات ۋاسىتىلىرىدا سالامەتلىك سەۋەبىدىن يىغىۋېلىنغان يېمەكلىك مەھسۇلاتلىرى ئېلان قىلىنماقتا.

ئامېرىكا بىرلەشمە ئاگېنتلىقىنىڭ خەۋەر قىلىشىچە، بۇلغانغان يېمەكلىك مەھسۇلاتلىرى مەسىلىسى، بېيجىڭ ئولىمپىك تەنھەرىكەت يىغىنىنىڭ ئۆتكۈزۈلۈشى بىلەن خەلقىنىڭ قوللىشىغا ئېرىشىدىغانلىقىنى ئۈمىد قىلغان خىتاي ھۆكۈمىتى ئۈچۈن چوڭ بىر سىياسىي مەسىلىگە ئايلانماقتا.

بۇ ئارىدا خىتاي سۈت مەھسۇلاتلىرى كرىزىسى چەتئەللەردىمۇ كېڭىيىۋاتقان بولۇپ، بۈگۈن مالايشىيا، سىنگاپۇر، ياپونىيە قاتارلىق نۇرغۇن دۆلەتلەر خىتايدىن سۈت مەھسۇلاتلىرى ئىمپورت قىلىشىنى چەكلىگەنلىكىنى جاكارلىدى.

پىكىرلەر (0)
Share
تولۇق بەت