ប្រសាសន៍របស់លោកនាយករដ្ឋមន្ត្រីគឺបានធ្វើឡើងនៅមួយថ្ងៃមុនដែលអាជ្ញាធរក្រុងភ្នំពេញត្រៀមរៀបចំពិធីដ៏អឹកអធឹកមួយរំឭកទិវា៧មករា ឆ្នាំ១៩៧៩កន្លងមកនោះ។
លោកនាយករដ្ឋមន្ត្រីបានមានប្រសាសន៍ថា ៖ «នេះជាសច្ចៈធម៌នៃប្រវត្តិសាស្ត្រ សូម្បីតែពួកអគតិ ពួកជ្រុលនិយម គេត្រូវតែទទួលស្គាល់នូវការពិតបែបនេះ។ បើអ្នកឯងមិនហ៊ានទទួលស្គាល់នូវការពិត អ្នកឯងមិនមែនជាមនុស្សទេ គឺពិតជាសត្វ។ នេះជារឿងពិត បើគ្មានថ្ងៃរំដោះ៧មករា ១៩៧៩ទេ តើយើងមានថ្ងៃនេះទេ?»។
រហូតមកទល់ពេលនេះបើទោះបីជាទិវា៧មករាត្រូវរដ្ឋាភិបាលខ្មែរបានចាត់ទុកជាទិវាបុណ្យជាតិរំឭកជ័យជម្នះលើរបបប្រល័យពូជសាសន៍ខ្មែរក្រហមក៏ដោយ ក៏មតិមួយចំនួនបានចោទថាជាទិវានាំមកនូវការលុកលុយរបស់កងទ័ពវៀតណាមចូលមកក្នុងប្រទេសកម្ពុជានាពេលនោះផងដែរ។
នៅមុនការប្រារព្ធទិវាថ្ងៃ៧មករានោះដែរ អាជ្ញាធរបានឲ្យដឹងថាគេបានរកឃើញគ្រាប់បែកច្នៃមិនទាន់ផ្ទុះចំនួន៣គ្រាប់ដែលគេបានដាក់បង្កៃក្នុងផ្លូវរាជធានីភ្នំពេញ។
អាជ្ញាធរបានសង្ស័យថាជាអំពើជាប់ទាក់ទងនឹងជនសង្ស័យ២នាក់ដែលគេនៅមិនទាន់ចាប់ខ្លួនបាននៅឡើយ៕