អ្នកតំណាងរាស្ត្រគណបក្សប្រឆាំង និងក្រុមអ្នកសិក្សាស្រាវជ្រាវ ចុះទៅពិនិត្យមើលដោយផ្ទាល់នៅតំបន់ដែលស្ថិតនៅក្នុងគម្រោងសាងសង់ទំនប់វារីអគ្គិសនីនៅក្នុងស្រុកកោះកុង និងស្រុកថ្មបាំង ខេត្តកោះកុង នៅថ្ងៃចន្ទ ទី១៦ មេសា ឆ្នាំ២០១២។
លោក សុន ឆ័យ អ្នកតំណាងរាស្ត្រនៃគណបក្ស សម រង្ស៊ី មានប្រសាសន៍ថា លោកនិងសហការីអ្នកសិក្សាស្រាវជ្រាវរបស់លោក នឹងចំណាយពេលប្រមាណជាពីរថ្ងៃ ឬអាចច្រើនជាងនេះ ដើម្បីសិក្សាអំពីផលប៉ះពាល់ដែលបណ្ដាលមកពីគម្រោងសាងសង់ទំនប់វារីអគ្គិសនីនៅតំបន់នោះឲ្យបានច្បាស់លាស់។
តំបន់ដែលលោកត្រូវធ្វើការសិក្សាអង្កេតជាបឋមនោះ គឺនៅតំបន់ស្ទឹងអារ៉ែង ដែលរដ្ឋាភិបាល និងក្រុមហ៊ុនចិន មានគម្រោងនឹងចាប់ផ្ដើមសាងសង់ទំនប់វារីអគ្គិសនីនៅពេលដ៏ឆាប់ខាងមុខនេះ។
លោក សុន ឆ័យ៖ «ដោយសារមានការព្រួយបារម្ភពីប្រជាពលរដ្ឋនៅតំបន់ស្ទឹងអារ៉ែង ថានឹងកើតមានវារីអគ្គិសនីនៅស្ទឹងអារ៉ែងនោះ មានផលប៉ះពាល់លើព្រៃឈើធម្មជាតិ រុក្ខជាតិ សត្វព្រៃ មានត្រីនៅក្នុងស្ទឹងអាចស្លាប់ផុតពូជ ដែលវាមានផលប៉ះពាល់មិនត្រឹមតែជីវភាពប្រជាពលរដ្ឋនៅតំបន់នោះទេ គឺថា សត្វដ៏កម្រនៅទីនោះនឹងអាចបាត់បង់»។
លោកបន្តថា ការចុះអង្កេតស្រាវជ្រាវនេះបន្ទាប់ពីមានក្តីបារម្ភពីប្រជាពលរដ្ឋពីផលប៉ះពាល់ និងមានសេចក្ដីរាយការណ៍ជាញឹកញាប់ពីសកម្មភាពកាប់ឈើនៅតំបន់នោះយ៉ាងអនាធិបតេយ្យ៖ «យើងដឹងថានៅមិនឆ្ងាយពីស្ទឹងអារ៉ែងប៉ុន្មាន មានស្ទឹងតាតៃ ដែលមានការកសាងទំនប់វារីអគ្គិសនីរួចទៅហើយ មានការកាប់ព្រៃឈើក្នុងទំនប់នោះមួយចំនួនផង ហើយក៏មានការកាប់ឈើនៅទីនោះ»។
ក្រោយការចងក្រងរបាយការណ៍អំពីបញ្ហានេះចប់សព្វគ្រប់ លោកនឹងផ្ញើរបាយការណ៍នោះទៅរដ្ឋាភិបាល ដើម្បីដោះស្រាយ និងត្រូវមានវិធានការបញ្ឈប់បញ្ហាដែលកើតមានទាំងនោះជាបន្ទាន់។
កន្លងមកលោកនាយករដ្ឋាមន្ត្រី ហ៊ុន សែន ធ្លាប់បានប្រតិកម្មចំពោះអ្នករិះគន់ទៅលើផលប៉ះពាល់បរិស្ថានដោយសារការសាងសង់ទំនប់វារីអគ្គិសនីនោះថា ជាក្រុមជ្រុលនិយម។ ប៉ុន្តែលោកបានទទួលស្គាល់ថា រាល់ការអភិវឌ្ឍ គឺជៀសមិនផុតពីផលប៉ះពាល់នោះឡើយ។
រដ្ឋាភិបាលមិនទាន់បានបញ្ជាក់ច្បាស់លាស់នៅឡើយថា ទំនប់វារីអគ្គិសនីនៅអារ៉ែងនោះ នឹងសាងសង់នៅពេលណាមួយច្បាស់នៅឡើយទេ។ ប៉ុន្តែលោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានបញ្ជាក់ថា ទំនប់នេះអាចនឹងសាងសង់រួចនៅឆ្នាំ២០១៧ ខាងមុខ៖ «នៅឆ្នាំ២០១៧ ហ្នឹង ទំនប់វារីអគ្គិសនីឆាយអារ៉ែង ១០០ មេហ្គាវ៉ាត់ទៀតដើរ»។
អ្នកភូមិបានឲ្យដឹងដែរថា ក្រុមការងាររបស់រដ្ឋាភិបាលបានមកប្រជុំប្រាប់ប្រជាពលរដ្ឋ និងអាជ្ញាធរមូលដ្ឋានថា គេគ្រោងនឹងសាងសង់ទំនប់វារីអគ្គិសនីនៅស្ទឹងអារ៉ែងនេះ នៅដើមឆ្នាំ២០១៣ ខាងមុខនេះ។
គម្រោងនេះអាចប៉ះពាល់ដល់ឃុំចំនួនបី គឺឃុំជំនាប់ ឃុំប្រឡាយ និងមួយភាគនៃឃុំថ្មដូនពៅ។ ឃុំទាំងនេះស្ថិតនៅក្នុងស្រុកថ្មបាំង ខេត្តកោះកុង។
នៅខេត្តកោះកុង មានគម្រោងការសាងសង់ទំនប់វារីអគ្គិសនីដែលកំពុងសាងសង់ និងគ្រោងចាប់ផ្ដើមសាងសង់សរុបចំនួនបីកន្លែងធំៗ។ ទី១ ទំនប់វារីអគ្គិសនីតាតៃ កម្លាំង ២៤៦ម៉េហ្គាវ៉ាត់ (MW) ស្ថិតនៅក្នុងឃុំបឫស្សីជ្រុំ ស្រុកថ្មបាំង និងឃុំតាតៃ ស្រុកកោះកុង។ ទី២វារីអគ្គិសនីឫស្សីជ្រុំក្រោម ស្ថិតនៅឃុំប៉ាក់ខ្លង ស្រុកមណ្ឌលសីមា។ ទំនប់នេះអាចផលិតថាមពលអគ្គិសនីបាន ៣៣៨មេហ្គាវ៉ាត់ និងទី៣ ទំនប់វារីអគ្គិសនីស្ទឹងអារ៉ែង ដែលមានថាមពលប្រមាណ ១០០ម៉េហ្គាវ៉ាត់ (MW) ស្ថិតនៅស្រុកថ្មបាំង៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។