ប្រធានកម្មវិធីជាតិប្រយុទ្ធជំងឺគ្រុនឈាមនៃក្រសួងសុខាភិបាលលោកវេជ្ជបណ្ឌិត ង៉ាន់ ចាន់ថា បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីថា មូលហេតុដែលនាំឲ្យមានការស្លាប់បែបនេះក៏ដោយសារតែឪពុកម្ដាយរបស់អ្នកជំងឺមានការយឺតយ៉ាវយកកូនមកធ្វើការព្យាបាលនៅមន្ទីរពេទ្យរដ្ឋឲ្យបានទាន់ពេលវេលា។
លោកវេជ្ជបណ្ឌិត ង៉ាន់ ចាន់ថា មានប្រសាសន៍ដូច្នេះថា ៖ «ដល់អ៊ីចឹងទៅពេទ្យរដ្ឋរបស់យើងមានការលំបាកក្នុងការជួយសង្រ្គោះណាស់ ប៉ុន្តែទោះយ៉ាងណាក៏យើងនៅតែព្យាយាមអប់រំគាត់ ដើម្បីឲ្យគាត់ស្រូតមកទទួលយកការពិគ្រោះជាមួយគ្រូពេទ្យយើងដែលនៅតាមមណ្ឌលសុខភាពដើម្បីឲ្យគ្រូពេទ្យយើងបញ្ជូនមកមន្ទីរពេទ្យរដ្ឋឲ្យបានត្រឹមត្រូវ និងទាន់ពេលវេលា។ គ្រប់ពេទ្យនៅតាមខេត្ត ឬតាមក្រុង អត់មានយកប្រាក់ហិរញ្ញប្បទានទេ មកទទួលការព្យាបាល យើងមានការលើកលែង ហើយយើងមានមូលនិធិសមធម៌ដើម្បីចេញជំនួសជូន»។
មន្ដ្រីកម្មវិធីជាតិប្រយុទ្ធជំងឺគ្រុនឈាមបានប្រាប់ឲ្យដឹងទៀតដែរថា ក្រៅពីមានកុមារស្លាប់នៅខេត្តកំពង់ស្ពឺ និងខេត្តកំពង់ចាម ឥឡូវនេះជំងឺគ្រុនឈាមបានផ្ទុះរាតត្បាតនៅទីផ្សេងៗទៀតដែរ ដូចជានៅទីក្រុងភ្នំពេញ ខេត្តកណ្ដាល ខេត្តព្រះសីហនុ ខេត្កកោះកុង និងខេត្តកំពត ប៉ុន្តែមិនបណ្ដាលឲ្យមានមនុស្សស្លាប់ទេ។
ប្រធានកម្មវិធីប្រយុទ្ធជំងឺគ្រុនឈាមប្រចាំខេត្ដកោះកុង លោកវេជ្ជបណ្ឌិត ម៉ក់ គឹមលី បានមានប្រសាសន៍ប្រាប់ដែរថា នៅខេត្តកោះកុង គឺគេកំពុងតែធ្វើយុទ្ធនាការដាក់ថ្នាំអាបែតដើម្បីទប់ស្កាត់ការរីករាលដាលជំងឺគ្រុនឈាម ជាពិសេសនៅក្នុងឃុំបឹងព្រាវ ស្រុកស្រែអំបិល ដែលទើបតែផ្ទុះជំងឺគ្រុនឈាមនោះ។
លោកវេជ្ជបណ្ឌិត ម៉ក់ គឹមលី មានប្រសាសន៍ដូច្នេះថា ៖ «ល្អជាងគេហើយ ដាក់អាបែតហ្នឹង។ បើសិនណាថា ផ្ទុះខ្លាំងមែនទែនអីនៅមន្ទីរសុខាភិបាល យើងមានម៉ាស៊ីនបាញ់ ៥គ្រឿង»។
មន្រ្តីមជ្ឈមណ្ឌលជាតិប្រយុទ្ធជំងឺគ្រុនឈាមបានបញ្ជាក់ប្រាប់ដែរថា ចាប់តាំងពីដើមឆ្នាំរហូតមកដល់ពេលនេះ ការកើតជំងឺគ្រុនឈាមនៅទូទាំងកម្ពុជាមានចំនួនជិត ៦០០ករណី។ ចំពោះចំនួននេះ បើគេធ្វើការប្រៀបធៀបទៅឆ្នាំកន្លងទៅ ក្នុងរយៈពេលដូចគ្នានោះ គេឃើញថា ជំងឺគ្រុនឈាមថយចុះក្នុងឆ្នាំនេះ ក៏ដោយសារតែមានការជួយធ្វើអន្តរាគមន៍របស់ក្រសួងសុខាភិបាលកាន់តែមានសន្ទុះកើនឡើង។
គួរជម្រាបជូនដែរថា ចំពោះជំងឺគ្រុនឈាមនៅកម្ពុជាគេសង្កេតឃើញជាទូទៅ តែកាលណាដល់រដូវវស្សាមានភ្លៀងធ្លាក់ច្រើននោះគឺជំងឺគ្រុនឈាមបានចាប់ផ្តើមធ្វើការរាតត្បាតដូចជាឥឡូវនេះ មានការធ្លាក់ភ្លៀងឆាប់ពីដើមឆ្នាំ គេឃើញជំងឺគ្រុនឈាមបានចាប់ផ្តើមផ្ទុះដែរ។ ហើយអ្នកដែលរងគ្រោះខ្លាំង ភាគច្រើនជាកុមារចាប់ពីអាយុ១៥ឆ្នាំចុះ ចំណែកឯចំពោះមនុស្សចាស់គឺគេកម្រឃើញកើតមានជំងឺនេះណាស់។
ទាក់ទងនឹងយុទ្ធនាការនៃការប្រយុទ្ធជំងឺគ្រុនឈាមនៅកម្ពុជាសម្រាប់ឆ្នាំនេះគេឃើញមានការជួយឧបត្ថម្ភជាថវិកាពីបណ្ដាអង្គការអន្ដរជាតិមួយចំនួន ដូចជា ធនាគារ ADB បានផ្ដល់ចំនួនជាង ៥សែនដុល្លារ ហើយនិងធនាគារពិភពលោក អង្គការ DFID និង AUSAID បានផ្ដល់ចំនួន១លាន៨សែនដុល្លារ៕