សមត្ថកិច្ច​ខេត្ត​ឧត្តរមានជ័យ​បណ្ដេញ​ពលរដ្ឋ​ជាង​១០០​គ្រួសារ​ចេញ​ពី​លំនៅ

សមត្ថកិច្ច​ចម្រុះ​របស់​ខេត្ត​ឧត្តរមានជ័យ បាន​បណ្ដេញ​ប្រជា​ពលរដ្ឋ​ជាង ១០០​គ្រួសារ​ចេញ​ពី​លំនៅ​ឋាន ដោយ​គេ​អះអាង​ថា ពលរដ្ឋ​ទាំង​នោះ​បាន​មក​សង់​លំនៅ​ក្នុង​ដែន​ជម្រក​សត្វ។
ដោយ ហង្ស សាវយុត
2010-05-26
អ៊ីម៉ែល
មតិ
Share
បោះពុម្ព
ប៉ូលិស​អង្គុយ​ការពារ ក្បែរ​លំនៅ​ពលរដ្ឋ​ដែល​កំពុង​ឆេះ ក្នុង​អំឡុង​ពេល​ចុះ​បណ្ដេញ​ពលរដ្ឋ​ជាង ១០០​គ្រួសារ​ចេញ​ពី​លំនៅ​ឋាន នៅ​ឃុំ​អន្លង់វែង ស្រុក​អន្លង់វែង ខេត្ត​ឧត្ដរមានជ័យ កាល​ពី​ថ្ងៃ​២៥ ឧសភា ២០១០។
ប៉ូលិស​អង្គុយ​ការពារ ក្បែរ​លំនៅ​ពលរដ្ឋ​ដែល​កំពុង​ឆេះ ក្នុង​អំឡុង​ពេល​ចុះ​បណ្ដេញ​ពលរដ្ឋ​ជាង ១០០​គ្រួសារ​ចេញ​ពី​លំនៅ​ឋាន នៅ​ឃុំ​អន្លង់វែង ស្រុក​អន្លង់វែង ខេត្ត​ឧត្ដរមានជ័យ កាល​ពី​ថ្ងៃ​២៥ ឧសភា ២០១០។
RFA/Hang Savyouth

ក្រុម​អ្នក​ឃ្លាំ​មើល​ការ​រំលោភ​សិទ្ធិ​មនុស្ស​និយាយ​ថា អាជ្ញាធរ និង​ក្រុម​សមត្ថកិច្ច​ចម្រុះ​របស់​ខេត្ត​ឧត្តរមានជ័យ មាន​ប៉ូលិស កង​រាជ​អាវុធ​ហត្ថ និង​ទាហាន បាន​ចុះ​បណ្ដេញ​ប្រជា​ពលរដ្ឋ​ជាង ១០០​គ្រួសារ ដែល​គេ​អះអាង​ថា​បាន​ចូល​ទៅ​សង់​ទី​លំនៅ​ខុស​ច្បាប់ ក្នុង​តំបន់​ដែន​ជម្រក​សត្វ​ព្រៃ​នៃ​ឧទ្យានជាតិ​គូលែន​ព្រហ្ម​ទេព ឬ​ព្រៃស្អាក នៃ​ភូមិ​អូរអំបិល ឃុំ​អន្លង់វែង ស្រុក​អន្លង់វែង កាល​ពី​ព្រឹក​ថ្ងៃ​អង្គារ ទី​២៥ ខែ​ឧសភា​នេះ។

ក្រុម​ប្រជា​ពលរដ្ឋ​អះអាង​ថា អាជ្ញាធរ​បាន​រុះ​រើ និង​បណ្ដេញ​អ្នក​ភូមិ​ចេញ​ពី​លំនៅ​ប្រមាណ ១០០​ខ្នង ហើយ​ខ្ទម​ប្រជា​ពលរដ្ឋ​មួយ​ចំនួន​ទៀត​រង​ការ​ដុត​បំផ្លាញ​ពី​សំណាក់​អាជ្ញាធរ។

អភិបាល​ស្រុក​អន្លង់​វែង លោក យឹម ផាន់ណា បាន​មាន​ប្រសាសន៍​កាល​ពី​ព្រឹក​ថ្ងៃ​អង្គារ ទី​២៥ ឧសភា ក្នុង​ពេល​ចុះ​អនុវត្ត​ការ​បណ្ដេញ​នោះ ថា តំបន់​ព្រៃ​ស្អាក​គឺ​ជា​ដែន​ជម្រក​សត្វ​ព្រៃ​របស់​​ឧទ្យាន​ជាតិ​គូលែន​ព្រហ្ម​ទេព ដែល​ច្បាប់​បាន​ការពារ​មិន​ឲ្យ​មាន​ការ​ចូល​ទៅ​តាំង​ទី​លំនៅ​ខុស​ច្បាប់។

លោក យឹម ផាន់ណា បាន​បញ្ជាក់​ថា ៖ «ទី​នេះ​វា​ជា​តំបន់​ព្រៃ​ក្រាស់ ដែន​ឧទ្យាន​ជាតិ​គូលែន​ព្រហ្ម​ទេព ដែន​ជម្រក​សត្វ​ព្រៃ វា​ជា​តំបន់​ទេសចរណ៍​ផង។ ការ​អនុវត្ត​វិធានការ​ចុង​ក្រោយ​នេះ គឺ​ខាង​តុលាការ​ខេត្ត​សៀមរាប ឧត្ដរមានជ័យ​យើង​ផ្ទាល់ គាត់​អញ្ជើញ​មក ហើយ​និង​មាន​ឯកឧត្ដម​អភិបាល​រង​ខេត្ត​ឧត្ដរមានជ័យ ហើយ​និង​មាន​មេ​បញ្ជាការ​តំបន់​ប្រតិបត្តិការ​សឹក​សៀមរាប ហើយ​និង​ជំនាញ​នៅ​ក្នុង​ស្រុក​អន្លង់វែង។ នេះ​ជា​ផែនការ​របស់​ខាង​ក្រសួង លោក​ឲ្យ​យើង​នាំ​កម្លាំង​ទាំង​អស់​ហ្នឹង​ទៅ​អនុវត្ត»

អាជ្ញាធរ​ស្រុក​អន្លង់​វែង​បាន​កំណត់​ឲ្យ​ប្រជា​ពលរដ្ឋ​ទាំង​នោះ​ត្រូវ​រុះរើ និង​ចាក​ចេញ​ឲ្យ​អស់​ក្នុង​រយៈ​ពេល ៥​ថ្ងៃ​ខាង​មុខ ហើយ​បញ្ជូន​ពួក​គេ​ឲ្យ​ទៅ​រស់​នៅ​កន្លែង​ថ្មី​មួយ ដែល​អាជ្ញាធរ​បាន​បែងចែក​ឲ្យ​ នៅ​ភូមិ​រំចេក ឃុំ​អន្លង់វែង។

ប៉ុន្តែ​ក្រុម​ប្រជា​ពលរដ្ឋ​ខ្លះ​ដែល​ធ្លាប់​រស់​នៅ​តំបន់​ព្រៃ​ស្អាក​នោះ បាន​ជំទាស់​ថា ពួក​គេ​នឹង​មិន​ចាក​ចេញ​ទៅ​រស់​នៅ​កន្លែង​ថ្មី​ទេ ពីព្រោះ​កន្លែង​ថ្មី​ដែល​អាជ្ញាធរ​រៀបចំ​ឲ្យ​នោះ អាច​នឹង​ពុំ​មាន​ទឹក ឬ​ពុំ​មាន​ដី​ស្រែ​ចម្ការ​គ្រប់គ្រាន់​សម្រាប់​ពួក​គេ​ប្រកប​របរ​ចិញ្ចឹម​ជីវិត។

កន្លង​មក​អាជ្ញាធរ​បាន​ចាប់​ខ្លួន​តំណាង​អ្នក​ភូមិ​ម្នាក់​ដាក់​ពន្ធនាគារ ពី​បទ​កាប់​រាន​ដី​ព្រៃ​របស់​រដ្ឋ និង​ចាប់​ខ្លួន​មន្ត្រី​បរិស្ថាន ២​នាក់​ផ្សេង​ទៀត​ពី​បទ​លក់​ដី​ព្រៃ​របស់​រដ្ឋ​ទៅ​ឲ្យ​អ្នក​ភូមិ៕

ព័ត៌មាន (0)
Share
គេហទំព័រ​ទាំងមូល