អនុ​ប្រធាន​សហគមន៍​ការពារ​ព្រៃ​ឈើ​នៅ​រតនគិរី​ត្រូវ​ដក​បញ្ឈរ​ជើង

អនុ​ប្រធាន​សហគមន៍​ការពារ​ព្រៃ​ឈើ​ឃុំ​បានប៉ុង លោក ខៃ ខាវ ត្រូវ​បាន​ដក​បញ្ឈរ​ជើង​ហើយ​កាល​ពី​ពេល​ថ្មីៗ​នេះ។
ដោយ គង់ យុទ្ធនា
2010.03.20
Share on WhatsApp
Share on WhatsApp

មេ​ឃុំ​បានប៉ុង គឺ​លោក គី ខាំ បាន​ចោទ​ថា លោក ខៃ ខាវ បាន​ប្រព្រឹត្ត​ផ្តេសផ្តាស​ច្រើន​ណាស់ តែ​មិន​បាន​បញ្ជាក់​ថា​តើ​ជា​អ្វី​ខ្លះ​ឡើយ។ ដូច្នេះ​ឃុំ និង​គណៈកម្មការ​សហគមន៍​ការពារ​ព្រៃ​ឈើ​ឃុំ​បានប៉ុង បាន​សម្រេច​ដក​គាត់​បញ្ឈរ​ជើង​ពី​តួនាទី​កាល​ពី​ដើម​សប្តាហ៍​នេះ។

ប្រធាន​សហគមន៍​ការពារ​ព្រៃ​ឈើ​ឃុំ​បានប៉ុង លោក ហ៊ីង សឿន បញ្ជាក់​ថា សហគមន៍​នេះ​មាន​សមាជិក​គណៈកម្មការ​ចំនួន ១៨​នាក់ ហើយ​សមាជិក​គណៈកម្មការ​ទាំង​អស់​ត្រូវ​បាន​ប្រជាពលរដ្ឋ​បោះ​ឆ្នោត​ឲ្យ។ ដូច្នេះ​ការ​ដក​បញ្ឈរ​ជើង​ត្រូវ​បាន​ធ្វើ​ឡើង​បន្ទាប់​ពី​បាន​ហៅ​ជា​ច្រើន​សា​ឲ្យ​មក​ប្រជុំ​កិច្ច​ការងារ​នា​ពេល​កន្លង​មក ដោយសារ​តែ​លោក ខៃ ខាវ បាន​ធ្វើ​ហួស​ព្រំដែន​កំណត់ ដូច​ជា​ការ​ចាប់​ឈើ​ជាដើម​នោះ ហើយ​គាត់​មិន​បាន​មក​ចូលរួម​ប្រជុំ​សោះ។ ប៉ុន្តែ​ទោះ​ជា​យ៉ាង​ណា​គាត់​មិន​ទាន់​ត្រូវ​បាន​ដក​ទាំង​ស្រុង​ទេ ដរាប​ណា​សមាជិក​គណៈកម្មការ​ក្នុង​ចំណោម ១៨​នាក់​មិន​ទាន់​បាន​បោះ​ឆ្នោត​ដក​ដោយ​សំឡេង​ភាគ​ច្រើន​នោះ។

លោក ហ៊ីង សឿន បាន​ឲ្យ​ដឹង​ថា ៖ «ខ្ញុំ​មិន​ទាន់​ដក​ទេ ដក​មិន​ដក​ខ្ញុំ​មិន​ទាន់​ដឹង​ទេ! មុន​នឹង​ដក រៀបចំ​គណៈកម្មការ​ប្រជុំ​ទាំង​អស់ សម្រេច​ថា​ដក ទើប​ដក​បាន!»

ឃុំ​បានប៉ុង ស្រុក​វ៉ឺនសៃ ជា​តំបន់​ដែល​កំពុង​កើត​មាន​សកម្មភាព​កាប់ និង​ដឹក​ជញ្ជូន​ឈើ​ប្រណីត​ខុស​ច្បាប់​ខ្លាំងក្លា ហើយ​កាល​ពី​ខែ​កុម្ភៈ​កន្លង​មក ឈើ​ប្រណីត​ចំនួន ១៧៥​ដុំ​វែង ត្រូវ​បាន​លោក ខៃ ខាវ រួម​ជាមួយ​សហគមន៍ និង​អង្គការ​សិទ្ធិ​មនុស្ស អាដហុក រុករក​ឃើញ​គេ​លាក់​នៅ​ក្នុង​ព្រៃ ហើយ​បាន​ហៅ​រដ្ឋបាល​ព្រៃ​ឈើ​មក​ដឹក​ជញ្ជូន ក្រោយ​មក​ទៀត​គាត់​បាន​រាយ​ការណ៍​អំពី​ការ​ដឹក​ជញ្ជូន​ឈើ​ជា​ច្រើន​ឡាន​ធំ​ទៀត​ដល់​អាជ្ញាធរ​ស្រុក ក្នុង​បំណង​ឲ្យ​ជួយ​ទប់​ស្កាត់​ការ​បំផ្លាញ​នៅ​ទី​នោះ។

លោក ខៃ ខាវ ត្រូវ​បាន​អ្នក​ភូមិ និង​អង្គការ​នានា​ស្គាល់​ថា ជា​មនុស្ស​សកម្ម​ក្នុង​ការ​ទប់​ស្កាត់​បទល្មើស​កាប់ និង​ដឹក​ជញ្ជូន​ឈើ​ខុស​ច្បាប់​នៅ​ក្នុង​តំបន់​ឃុំ​បានប៉ុង ជា​ហេតុ​ធ្វើ​ឲ្យ​អ្នក​រក​ស៊ី​ខុស​ច្បាប់​មួយ​ចំនួន​មិន​សប្បាយ​ចិត្ត ហើយ​មេ​ឃុំ​វិញ​ក៏​បាន​ប្រកាស​ថា អនុ​ប្រធាន​សហគមន៍​រូប​នេះ​ត្រូវ​បាន​ដក​បញ្ឈរ​ជើង។

លោក ខៃ ខាវ បាន​បញ្ជាក់​ថា ជន​ល្មើស​ម្ចាស់​ឈើ​បាន​គំរាម​រូប​លោក​ជា​ច្រើន​លើក ច្រើន​សា​រួច​មក​ហើយ។ ឯ​អាជ្ញាធរ​វិញ​ក៏​មិន​បាន​គាំទ្រ​ជួយ​ការពារ​រូប​លោក​ដែរ ក្នុង​ករណី​ដែល​មាន​ការ​គំរាម​នោះ។

លោក​បន្ត​ថា អ្នក​ភូមិ​ចង់​ឲ្យ​លោក​នៅ​បន្ត​ការងារ​ក្នុង​តួនា​ទី​នេះ​ទៀត ប៉ុន្តែ​លោក​អាច​នឹង​មិន​បន្ត​ការងារ​ទៀត​ឡើយ ព្រោះ​កន្លង​មក​ត្រូវ​គេ​គំរាម​កំហែង​ផង មិន​តែ​ប៉ុណ្ណោះ​ត្រូវ​ខាង​ឃុំ​ប្រកាស​ថា ដក​បែប​នេះ​ទៀត។

សមាជិក​សហគមន៍​ការពារ​ព្រៃ​ឈើ​ឃុំ​បានប៉ុង​ម្នាក់ គឺ​លោក ឡ ប៊ុនប៉េង មិន​សប្បាយ​ចិត្ត​ក្នុង​រឿង​ដក​លោក ខៃ ខាវ នេះ​ទេ ហើយ​លោក​បាន​ហៅ​ថា ជា​ទង្វើ​ខុស​ច្បាប់ ព្រោះ​លោក ខៃ ខាវ ត្រូវ​បាន​អ្នក​ភូមិ​បោះ​ឆ្នោត​ជ្រើស​ឲ្យ​ធ្វើ​ជា​អនុ​ប្រធាន​សហគមន៍ មិន​មែន​ខាង​សាលា​ឃុំ​ជា​អ្នក​តែងតាំង​ឡើយ។

លោក ឡ ប៊ុនប៉េង បាន​អះអាង​ថា ៖ «គំនិត​ខ្ញុំ​វិញ ...អត់​មាន​ឈប់​ទេ ព្រោះ​ឈប់​អី មិន​មែន​មេ​ឃុំ​ឯ​ណា​តែងតាំង​សហគមន៍ ព្រោះ​សហគមន៍​វា​មាន​ខាង​គេ​ផ្សេង​គេ​អ្នក​តែងតាំង រៀបចំ​បោះ​ឆ្នោត​ត្រឹមត្រូវ មិន​អ៊ីចឹង!»

មន្រ្តី​សម្រប​សម្រួល​អង្គការ​សិទ្ធិ​មនុស្ស អាដហុក ខេត្ត​រតនគិរី លោក ប៉ែន ប៊ុណ្ណារ៍ មាន​ប្រសាសន៍​ថា ការ​ដក​សកម្មជន​ការពារ​ផល​ប្រយោជន៍​ព្រៃ​ឈើ​រូប​នោះ​គឺ​ជា​រឿង​ខុស​ច្បាប់៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល