សាលាក្ដី​ខ្មែរ​ក្រហម​ភាគី​កម្ពុជា​នឹង​អស់​ថវិកា​នៅ​ខែ​វិច្ឆិកា ឆ្នាំ​២០១០

មន្ត្រី​សាលាក្ដី​ខ្មែរ​ក្រហម​ឲ្យ​ដឹង​ថា សាលាក្ដី​ខ្មែរ​ក្រហម​ខាង​ភាគី​កម្ពុជា​នឹង​អស់​ថវិកា​សម្រាប់​ចំណាយ​ទៅ​លើ​សកម្មភាព​ការងារ​របស់​ខ្លួន នៅ​បំណាច់​ខែ​វិច្ឆិកា ឆ្នាំ​២០១០​នេះ។
ដោយ ដែន អយុធ្យា
2010-07-30
អ៊ីម៉ែល
មតិ
Share
បោះពុម្ព
អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា​បើក​សវនាការ​លើ​ករណី​បណ្ដឹង​ឧទ្ធរណ៍​របស់ ខៀវ សំផន កាលពី​ថ្ងៃ​៤ ធ្នូ ២០០៨។
អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា​បើក​សវនាការ​លើ​ករណី​បណ្ដឹង​ឧទ្ធរណ៍​របស់ ខៀវ សំផន កាលពី​ថ្ងៃ​៤ ធ្នូ ២០០៨។
AFP Photo

លោក ឌឹម សុវណ្ណារុំ មន្ត្រី​ទទួល​បន្ទុក​កិច្ចការ​ព័ត៌មាន​សាលាក្ដី​ខ្មែរ​ក្រហម មាន​ប្រសាសន៍​ឲ្យ​វិទ្យុ​អាស៊ី​សេរី​ដឹង​នៅ​ថ្ងៃ​ទី​៣០ ខែ​កក្កដា ថា សាលាក្ដី​ខាង​ភាគី​ជាតិ​មាន​ថវិកា​សម្រាប់​ចំណាយ​ទៅ​លើ​ប្រាក់​ខែ​បុគ្គលិក​ត្រឹម​ខែ​​វិច្ឆិកា ឆ្នាំ​២០១០ ក្នុង​បេសកកម្ម​ស្វែងរក​យុត្តិធម៌​ជូន​ជន​រងគ្រោះ​ក្នុង​របប​ខ្មែរ​ក្រហម។

លោក ឌឹម សុវណ្ណារុំ បញ្ជាក់​ឲ្យ​ដឹង​ដូច្នេះ ៖ «សម្រាប់​ពេល​នេះ​ខាង​ផ្នែក​ជាតិ​ពុំ​មាន​ជួប​បញ្ហា​ខ្វះ​ថវិកា​ជា​បន្ទាប់​ត​ទៅ​ទៀត​ទេ ដោយសារ​តែ​ឥឡូវ​នេះ​យើង​បាន និង​កំពុង​ទទួល​វិភាគទាន​ស្ម័គ្រ​ចិត្ត​ពី​សហគមន៍​អឺរ៉ុប។ អ៊ីចឹង​ថវិកា​ដែល​មាន​នៅ​ក្នុង​គណនេយ្យ​ផ្នែក​ជាតិ​ហ្នឹង អាច​អនុញ្ញាត​ឲ្យ​ផ្នែក​ជាតិ​ហ្នឹង​មិន​ជួប​ប្រទះ​កង្វះ​ខាត​ថវិកា​ទេ ហើយ​អាច​ឈាន​ទៅ​បើក​ប្រាក់​ខែ​ជា​ប្រក្រតី​ជូន​បុគ្គលិក​ឡើង​វិញ​ពី​ពេល​នេះ រហូត​ដល់​ចុង​ខែ​វិច្ឆិកា ឆ្នាំ​២០១០»

សាលាក្ដី​ខ្មែរ​ក្រហម​កាល​ពី​ថ្ងៃ​ទី​២៦ ខែ​កក្កដា​នេះ ទើប​បាន​ប្រកាស​សាលក្រម​លើ​សំណុំរឿង ០០១ ដែល​មាន​ជន​ជាប់​ចោទ​ឈ្មោះ កាំង ហ្កេកអ៊ាវ ហៅ ឌុច អតីត​មេ​គុក​ទួលស្លែង ឬ​មន្ទីរ​ស-២១ ឲ្យ​ជាប់​ពន្ធនាគារ ៣៥​ឆ្នាំ។ បច្ចុប្បន្ន​សាលាក្ដី​កំពុង​បន្ត​បេសកកម្ម​របស់​ខ្លួន​ទៅ​លើ​សំណុំរឿង ០០២ បន្ត​ទៀត ដែល​មាន​អតីត​មេ​ដឹកនាំ​ខ្មែរ​ក្រហម ៥​រូប​ត្រូវ​បាន​ចោទ​ប្រកាន់។

សេចក្ដី​ប្រកាស​ព័ត៌មាន​របស់​សាលាក្ដី​ខ្មែរ​ក្រហម​បាន​ឲ្យ​ដឹង​ថា សំណុំរឿង ០០២ គឺ​ជា​សំណុំរឿង​ក្តី​របស់​អតីត​មេ​ដឹកនាំ​ខ្មែរ​ក្រហម​ចំនួន ៥​រូប រួម​មាន​លោក ខៀវ សំផន, លោក អៀង សារី, អ្នកស្រី អៀង ធីរិទ្ធ, លោក នួន ជា និង​អាច​មាន​លោក កាំង ហ្កេកអ៊ាវ ហៅ ឌុច ផង​ដែរ។ សាលាក្ដី​នឹង​ពិចារណា​ថា តើ​នឹង​បញ្ចូល ឌុច ក្នុង​សំណុំ​រឿង ០០២ នេះ​ជា​ចុង​ក្រោយ ឬ​យ៉ាង​ណា នៅ​ខែ​កញ្ញា​ខាង​មុខ​នេះ៕

ព័ត៌មាន (0)
Share
គេហទំព័រ​ទាំងមូល