អាជ្ញាធរ​ខែត្រ​កំពង់ធំ​ស្វែងរក​ចាប់​សកម្មជន​បក្ស​សម​រង្ស៊ី​ម្នាក់​ពី​បទ​ឃាតកម្ម

តុលាការ​ខេត្ត​កំពង់ធំ​កំពុង​ស្វែងរក​ចាប់​សកម្មជន​ម្នាក់​របស់​គណបក្ស សម រង្ស៊ី ក្រោម​បទ​ចោទ​ថា​បាន​ធ្វើ​ឃាត​ឪពុក​មា​របស់​ខ្លួន​កាល​ពី​ឆ្នាំ​២០០៦ ប៉ុន្តែ​គ្រួសារ​របស់​ជន​សង្ស័យ​ក្នុង​រឿង​ឃាតកម្ម​នេះ​បាន​អះអាង​ថា ការ​ចោទ​ប្រកាន់​នោះ​គឺ​ជា​ការ​ទម្លាក់​កំហុស ដែល​ធ្វើ​ឡើង​ដោយ​មន្ត្រី​នគរបាល​មូលដ្ឋាន​ដើម្បី​ជំរិត​ទារ​ប្រាក់ ៥០០​ដុល្លារ។
ដោយ សុខ សេរី
2010-06-29
អ៊ីម៉ែល
មតិ
Share
បោះពុម្ព
អ្នក​គាំទ្រ​គណបក្ស​សមរង្ស៊ី​ឃោសនា​រក​សំឡេង​ឆ្នោត​ក្នុង​ការ​បោះឆ្នោត​ឃុំ​សង្កាត់​ កាល​ពី​ខែ​មេសា ២០០៧។
អ្នក​គាំទ្រ​គណបក្ស​សមរង្ស៊ី​ឃោសនា​រក​សំឡេង​ឆ្នោត​ក្នុង​ការ​បោះឆ្នោត​ឃុំ​សង្កាត់​ កាល​ពី​ខែ​មេសា ២០០៧។
RFA Photo

សកម្មជន​គណបក្ស សម រង្ស៊ី ឈ្មោះ ឌី ឌីន អាយុ ៣៣​ឆ្នាំ នៅ​ក្នុង​ភូមិ​ស្រើង ឃុំ​ស្រើង ស្រុក​ប្រាសាទ​សម្បូរណ៍ ខេត្ត​កំពង់ធំ កំពុង​តែ​រត់​លាក់​ខ្លួន នៅ​គ្រា​ដែល​តុលាការ​ខេត្ត​កំពង់ធំ​បាន​ចេញ​ដីកា​នាំ​ខ្លួន​កាល​ពី​ថ្ងៃ​ទី​២៨ ខែ​មិថុនា​នេះ ចេញ​ដោយ​ចៅក្រម​ស៊ើប​សួរ គឺ​លោក ទិត សុទ្ធីបូរាឆាត ក្រោម​បទ​ចោទ​ថា បាន​សម្លាប់​លោក ហ៊ឹម ឃិន ជា​ឪពុក​មា​របស់​ខ្លួន​កាល​ពី​ឆ្នាំ​២០០៦។

សាច់​ញាតិ​របស់​ជន​រងគ្រោះ​មិន​បាន​ប្ដឹង​សកម្មជន​នេះ​ទេ ប៉ុន្តែ​អាជ្ញាធរ​មូលដ្ឋាន​ជា​អ្នក​ដើម​បណ្ដឹង​ក្នុង​សំណុំរឿង​នេះ ហើយ​នេះ​ជា​ការ​កោះ​ហៅ​លើក​ទី​៣​ហើយ។

សកម្មជន​គណបក្ស សម រង្ស៊ី ឈ្មោះ ឌី ឌីន ថ្លែង​ថា ខ្លួន​កំពុង​តែ​ស្វែងរក​ការ​ជួយ​អន្តរាគមន៍​ជួយ​រក​យុត្តិធម៌​ចំពោះ​រឿង​នេះ ៖ «គេ​សុំ​ខ្ញុំ​ឃាត់​ខ្លួន តែ​ខ្ញុំ​អត់​មាន​ឲ្យ​បង​ឃាត់​ខ្លួន​ទេ ព្រោះ​ខ្ញុំ​អត់​មាន​រឿង​ផង! ពេល​ហើយ​គេ​ចុច​មក ប៉ូលិស អធិការ​ស្រុក ឈ្មោះ ភោគ លី ហ្នឹង។ ភោគ លី ចុច​ទៅ​ទូរស័ព្ទ​តុលាការ​ហ្នឹង​ឲ្យ​ជួប​ខ្ញុំ។ ជួប​ទៅ​គេ​ថា ភោគ លី អធិការ​រង​ហ្នឹង គេ​ថា ឈ្មោះ ឌី ឌីន ហ្នឹង បើ​មិន​ឲ្យ​លុយ​ទៅ​គេ ៥០០​ដុល្លារ​ទេ ខ្លួន​ឯង​មិន​រួច​ខ្លួន​ទេ! ឥឡូវ​ខ្ញុំ​ថា អត់​មាន​លុយ​ទេ!»

សកម្មជន​រូប​នេះ​បាន​ប្រាប់​ថា លោក​គ្មាន​ថវិកា​ដើម្បី​ជួល​មេធាវី​ការពារ​ក្តី​នេះ​ទេ ដោយសារ​ជីវភាព​ក្រីក្រ។

អធិការ​រង​នគរបាល​ស្រុក​ប្រាសាទ​សម្បូរណ៍ ខេត្ត​កំពង់ធំ លោក ភោគ លី ដែល​រង​ការ​ចោទ​ថា លោក​ទាមទារ​ប្រាក់​ចំនួន ៥០០​ដុល្លារ កាល​ពី​ខែ​ឧសភា ជា​ថ្នូរ​នឹង​ការ​មិន​ចាប់​ខ្លួន បាន​មាន​ប្រសាសន៍​ពន្យល់​ថា លោក​គ្រាន់​តែ​សង្ស័យ ហើយ​គ្មាន​ភស្តុតាង​ទេ​លើ​សកម្មជន​រូប​នោះ។

លោក ភោគ លី បាន​បញ្ជាក់​ថា ៖ «មិន​មាន​ភស្តុតាង​អី​ឲ្យ​ច្បាស់លាស់​ជាក់លាក់ ទៅ​ឃើញ​ជាក់ស្ដែង​ទេ»

សុខ សេរី ៖ គាត់​ចោទ​ប្រកាន់​ថា លោក​បាន​ទាក់ទង​ទៅ​គាត់​តាម​ទូរស័ព្ទ​ក្ដី ជួប​ក្ដី ថា​សុំ​ទារ ៥០០​ដុល្លារ បើ​មិន​អ៊ីចឹង​ទេ​ត្រូវ​ចាប់​ខ្លួន តើ​រឿង​ហ្នឹង​ពិត​ទេ? ភោគ លី ៖ អត់​ទេ! ខ្ញុំ​មិន​ដែល​បាន​ទាក់ទង​ជាមួយ​គាត់​អ៊ីចឹង​ផង។

ភរិយា​របស់​ជន​រងគ្រោះ​ឈ្មោះ ហ៊ឹម ឃិន លោក​ស្រី ទី ហ៊ីម អាយុ ៣៥​ឆ្នាំ បាន​ថ្លែង​ថា ក្មួយ​របស់​លោក​ស្រី​ឈ្មោះ ឌី ឌីន និង​ឪពុក​មា​ឈ្មោះ ហ៊ឹម ឃិន បាន​ហូប​បាយ​ជុំ​គ្នា​នៅ​ក្នុង​ផ្ទះ នៅ​ពេល​យប់ ស្រាប់តែ​មាន​គេ​ហៅ​ស្វាមី​ចេញ​ទៅ​ដេញ​គោ ហើយ​បាន​រង​ការ​បាញ់​សម្លាប់​នៅ​ពេល​នោះ ៖ «ចេញ​ទៅ​គាត់​អើត​តាម​បង្អួច គេ​បាញ់​តែម្ដង!»

អ្នក​សម្រប​សម្រួល​ស្ដីទី​អង្គការ​ការពារ​សិទ្ធិ​មនុស្ស លីកាដូ នៅ​ក្នុង​ខេត្ត​កំពង់ធំ លោក អាង ចន្ធី បាន​មាន​ប្រសាសន៍​ថា បើ​សិន​ណា​លោក​បាន​ទទួល​បណ្ដឹង​ពី​សកម្មជន​នោះ លោក​នឹង​ផ្ដល់​កិច្ច​ការពារ​តាម​នីតិ​វិធី។

លោក អាង ចន្ធី បាន​អះអាង​ថា ៖ «បើ​សិន​ណា​គាត់​ពឹង​មក​ខាង​ខ្ញុំ ខ្ញុំ​នឹង​ទាក់ទង​ទៅ​ខាង​ភ្នំពេញ ខ្ញុំ​ថា តើ​ត្រូវ​មាន​គោលការណ៍ មេធាវី​ខាង​លីកាដូ​ខ្ញុំ​នៅ​ភ្នំពេញ កាន់​ឲ្យ​គាត់​កើត ឬ​មួយ​ក៏​អត់... បើ​មិន​កើត​ទេ ខាង​ខ្ញុំ​នឹង​រក​មេធាវី​អង្គការ​ផ្សេង​ឲ្យ​កាន់​ជូន​គាត់»

សកម្មជន​រូប​នេះ​បាន​ឲ្យ​ដឹង​ថា លោក​មិន​ចូល​ខ្លួន​ទៅ​តុលាការ​តាម​ការ​កោះហៅ​នោះ​ទេ ដោយសារ​មាន​ការ​ព្រួយ​បារម្ភ​ខ្លាច​ត្រូវ​គេ​ចាប់​ខ្លួន៕

ព័ត៌មាន (0)
Share
គេហទំព័រ​ទាំងមូល