អ្នក​វិភាគ៖ លោក ហ៊ុន សែន គួរ​ទទួល​ជួប​លោក សុរិយា ស៊ូប៊ែឌី

អ្នក​វិភាគ​ស្ថានការណ៍​នយោបាយ និង​សង្គម​ស៊ីវិល​មួយ​ចំនួន បាន​បញ្ចេញ​ទស្សនៈ​ជុំវិញ​បញ្ហា​លោក​នាយក​រដ្ឋមន្ត្រី ហ៊ុន សែន បដិសេធ​មិន​ជួប​លោក សុរិយា ស៊ូប៊ែឌី (Surya Subedi) តំណាង​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា។
ដោយ ដែន អយុធ្យា
2012-12-15
អ៊ីម៉ែល
មតិ
Share
បោះពុម្ព
ពី​ឆ្វេង​: អ្នក​រាយការណ៍​ពិសេស​ស្ដីពី​ស្ថានភាព​សិទ្ធិ​មនុស្ស​ប្រចាំ​នៅ​កម្ពុជា លោក សុរិយា ស៊ូប៊ែឌី (Surya Subedi) និង​នាយក​រដ្ឋមន្ត្រី​កម្ពុជា លោក ហ៊ុន សែន។
ពី​ឆ្វេង​: អ្នក​រាយការណ៍​ពិសេស​ស្ដីពី​ស្ថានភាព​សិទ្ធិ​មនុស្ស​ប្រចាំ​នៅ​កម្ពុជា លោក សុរិយា ស៊ូប៊ែឌី (Surya Subedi) និង​នាយក​រដ្ឋមន្ត្រី​កម្ពុជា លោក ហ៊ុន សែន។
RFA & AFP Photo

អ្នក​វិភាគ​លើក​ឡើង​ថា ប្រមុខ​ដឹកនាំ​គួរ​ទទួល​ជួប​លោក សុរិយា ស៊ូប៊ែឌី ដើម្បី​ជជែក​គ្នា​ឲ្យ​ដឹង​ខុស​ដឹង​ត្រូវ ជា​ជាង​គេច​មិន​ហ៊ាន​ជួប​មុខ ហើយ​វាយ​ប្រហារ​ក្រោយ​ខ្នង។

ការ​ដែល​លោក​នាយក​រដ្ឋមន្ត្រី ហ៊ុន សែន មិន​ព្រម​បើក​ឱកាស​ឲ្យ​លោក សុរិយា ស៊ូប៊ែឌី ចូល​ជួប​ពិភាក្សា​នេះ នាំ​ឲ្យ​អ្នក​វិភាគ​ស្ថានការណ៍​សង្គម និង​មន្ត្រី​អង្គការ​ក្រៅ​រដ្ឋាភិបាល​ខ្លះ​រិះគន់​ចំពោះ​បញ្ហា​នេះ។ ពួក​គាត់​ថ្លែង​ថា ប្រមុខ​រដ្ឋាភិបាល​ខ្មែរ​មិន​គួរ​មិន​ទទួល​ជួប​តំណាង​ពិសេស​របស់​អង្គការ​សហប្រជាជាតិ​នោះ​ទេ។

លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី១៣ ខែ​ធ្នូ ឆ្នាំ​២០១២ បាន​ថ្លែង​ជា​សាធារណៈ​ថា លោក​គ្មាន​កាតព្វកិច្ច​ណា​មួយ​ដែល​ត្រូវ​ទទួល​ជួប​លោក សុរិយា ស៊ូប៊ែឌី អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា នោះ​ទេ ព្រោះ​ថា​កម្ពុជា ជា​រដ្ឋ​មាន​អធិបតេយ្យ​ពេញ​លេញ ដែល​មិន​ចាំ​បាច់​ស្តាប់​ការ​ណែនាំ​ពី​ជន​បរទេស​នោះ​ឡើយ។

លោក​បណ្ឌិត សុខ ទូច អ្នក​វិភាគ​ស្ថានការណ៍​សង្គម បង្ហាញ​ទស្សនៈ​ផ្ទាល់​ខ្លួន​ថា លោក​នាយក​រដ្ឋមន្ត្រី ហ៊ុន សែន និង​លោក សុរិយា ស៊ូប៊ែឌី គួរ​មាន​ឱកាស​ជួប​ពិភាក្សា និង​លើក​យក​បញ្ហា​ខ្វែង​គំនិត​គ្នា​មួយ​ចំនួន​កន្លង​មក​ដើម្បី​ដោះស្រាយ។ លោក​ថា ការ​ខ្វែង​គំនិត ឬ​មិន​យល់​ស្រប​គ្នា​លើ​បញ្ហា​អ្វី​មួយ គួរ​ជួប​ពិភាក្សា​គ្នា​រក​ដំណោះស្រាយ ជា​ជាង​គេច​មុខ​គ្នា ហើយ​បើ​គេច​មុខ​គ្នា មិន​អាច​ដោះស្រាយ​បាន​ទេ។

មិន​ខុស​គ្នា​ទេ សម្រាប់​លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា ក៏​សោកស្ដាយ​ដែល​ប្រមុខ​រដ្ឋាភិបាល​ខ្មែរ​គ្មាន​សេចក្តី​ក្លាហាន និង​មិន​ហ៊ាន​ជួប​មុខ​តំណាង​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា ពេល​នេះ។ លោក​ថា ការ​ដែល​ប្រមុខ​ដឹកនាំ​មិន​ទទួល​ជួប​លោក សុរិយា ស៊ូប៊ែឌី បង្ហាញ​ឲ្យ​ឃើញ​ពី​ភាព​អាម៉ាស់​របស់​រដ្ឋាភិបាល​កម្ពុជា នៅ​លើ​ឆាក​អន្តរជាតិ។ លោក​បញ្ជាក់​ថា ទំនាស់​កើត​ឡើង​បើ​ភាគី​ទំនាស់​មិន​ចូល​ខ្លួន​មក​ដោះស្រាយ​រួម​គ្នា​ទេ បញ្ហា​ដែល​កើត​មាន​ជាមួយ​គ្នា​នឹង​មិន​អាច​ដំណោះស្រាយ​បាន​ទេ។ ការ​គេចវេស​លើ​បញ្ហា​អ្វី​មួយ ជា​ការ​មិន​ទទួល​ខុស​ត្រូវ​របស់​គូ​ភាគី​ទំនាស់ ហើយ​ទំនាស់​ក៏​មិន​អាច​ដោះស្រាយ​បាន​ដែរ។

ចំណែក​លោក ធន សារ៉ាយ ប្រធាន​អង្គការ​ការពារ​សិទ្ធិ​មនុស្ស​អាដហុក (Adhoc) មាន​ប្រសាសន៍​ថា ការ​ខ្វែង​គំនិត​គ្នា​រវាង​ប្រមុខ​ដឹកនាំ​រដ្ឋាភិបាល និង​លោក សុរិយា ស៊ូប៊ែឌី អាច​ជា​ដើម​ហេតុ​នាំ​ឲ្យ​លោក​នាយក​រដ្ឋមន្ត្រី​មិន​ចង់​ជួប​មន្ត្រី​អង្គការ​សហប្រជាជាតិ​រូប​នេះ។ ប៉ុន្តែ​លោក​មាន​ជំនឿ​ថា ថ្ងៃ​ខាង​មុខ ប្រមុខ​ដឹកនាំ​រដ្ឋាភិបាល​អាច​មាន​ជំហរ​ផ្សេង ឬ​ក៏​អាច​ទទួល​ជួប​លោក សុរិយា ស៊ូប៊ែឌី ក៏​ថា​បាន។ លោក ធន សារ៉ាយ បាន​ចាត់​ទុក​វត្តមាន​របស់​មន្ត្រី​សិទ្ធិ​មនុស្ស​របស់​អង្គការ​សហប្រជាជាតិ លោក ស៊ូប៊ែឌី មក​កម្ពុជា គឺ​ដើម្បី​ជួយ​បំពេញ​នូវ​ចំណុច​ខ្វះ​ខាត​ដែល​រដ្ឋាភិបាល​កម្ពុជា អនុវត្ត​មិន​ទាន់​មាន​ប្រសិទ្ធភាព​នៅ​លើ​វិស័យ​មួយ​ចំនួន ប៉ុន្តែ​បើ​ប្រមុខ​ដឹកនាំ​បដិសេធ​ជំនួប​របស់​គាត់ នឹង​អាច​នាំ​ឲ្យ​រដ្ឋាភិបាល​ខាត​ប្រយោជន៍​ទៅ​វិញ​ទេ។

ចំណែក​លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ យល់​ឃើញ​ថា ការ​ដែល​លោក​នាយក​រដ្ឋមន្ត្រី​គេច​មិន​ហ៊ាន​ជួប​មុខ​តំណាង​ពិសេស​អង្គការ​សហប្រជាជាតិ ទទួល​បន្ទុក​សិទ្ធិ​មនុស្ស​នៅ​កម្ពុជា នាំ​ឲ្យ​កម្ពុជា បាត់​បង់​កិត្តិយស។ លោក​ថា រដ្ឋាភិបាល​កម្ពុជា គួរ​ផ្សារភ្ជាប់​ទំនាក់​ទំនង​ជាមួយ​អន្តរជាតិ​ឲ្យ​បាន​ច្រើន ជា​ជាង​គេច​មិន​ជួប​មុខ ឬ​មិន​ទទួល​ខុស​ត្រូវ​ចំពោះ​កំហុស​ឆ្គង​របស់​ខ្លួន។ លោក​ព្រមាន​ថា មេ​ដឹកនាំ​ខ្មែរ​មិន​គួរ​គេច​មិន​ទទួល​ខុស​ត្រូវ​រាល់​ការ​ទិតៀន ឬ​មិន​ទទួល​យក​អនុសាសន៍​របស់​មន្ត្រី​សិទ្ធិ​មនុស្ស​អង្គការ​សហប្រជាជាតិ យក​មក​កែ​លំអ​នោះ​ទេ។

យ៉ាង​នេះ​ក្តី លោក​បណ្ឌិត សុខ ទូច ដែល​ជា​នាយក​សាកលវិទ្យាល័យ​ខេមរៈ ផង​នោះ បង្ហាញ​ទស្សនៈ​ផ្ទាល់​ខ្លួន​ថា បើ​ប្រមុខ​ដឹកនាំ​អនុញ្ញាត​ឲ្យ​លោក សុរិយា ស៊ូប៊ែឌី ចូល​ជួប រាល់​បញ្ហា​ដែល​កើត​មាន ឬ​រាល់​ការ​ចោទ​ប្រកាន់​នានា​កន្លង​មក​នឹង​អាច​ដោះស្រាយ​បាន។

លោក​នាយក​រដ្ឋមន្ត្រី ហ៊ុន សែន នៅ​ក្នុង​ពិធី​ចែក​សញ្ញាបត្រ​ដល់​និស្សិត​សាកលវិទ្យាល័យ​កម្ពុជា នៅ​វិទ្យាស្ថាន​ជាតិ​អប់រំ ព្រឹក​ថ្ងៃ​ទី១៣ ខែ​ធ្នូ លោក​បាន​ប្រកាស​ជា​សាធារណៈ​ថា លោក​គ្មាន​កាតព្វកិច្ច​ណា​មួយ​ដែល​ត្រូវ​ជួប​ជាមួយ​អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា គឺ​លោក សុរិយា ស៊ូប៊ែឌី នោះ​ទេ។ លោក​ថា កម្ពុជា ជា​រដ្ឋ​មាន​អធិបតេយ្យ​ពេញ​លេញ​ដែល​មិន​ចាំបាច់​ស្តាប់​ការ​ណែ​នាំ​ពី​ជន​បរទេស​នោះ​ទេ។

ការ​បដិសេធ​របស់​ប្រមុខ​ដឹកនាំ ធ្វើ​ឡើង​ស្រប​ពេល​លោក សុរិយា ស៊ូប៊ែឌី បេសកជន​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា កំពុង​បំពេញ​ទស្សនកិច្ច​ក្នុង​ប្រទេស​កម្ពុជា ហើយ​ព្យាយាម​ជួប​រូប​លោក ដើម្បី​ពិភាក្សា​ឈាន​ទៅ​រក​ការ​កែ​លំអ​ស្ថានភាព​សិទ្ធិ​មនុស្ស​នៅ​កម្ពុជា។

លោក​នាយក​រដ្ឋមន្ត្រី គូស​បញ្ជាក់​ថា រដ្ឋធម្មនុញ្ញ​កម្ពុជា តម្រូវ​ឲ្យ​លោក​ទទួល​ខុស​ត្រូវ​តែ​ចំពោះ​មុខ​រដ្ឋសភា និង​ប្រជាជន​កម្ពុជា តែ​ប៉ុណ្ណោះ។ លោក​ថា ការ​ដែល​រូប​លោក​សម្រេច​មិន​ជួប​បេសកជន​ពិសេស​របស់​អង្គការ​សហប្រជាជាតិ​រូប​នេះ គឺ​លោក​ចង់​ព្រមាន​ថា កម្ពុជា ជា​រដ្ឋ​ឯករាជ​មួយ។

លោក សុរិយា ស៊ូប៊ែឌី អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា កំពុង​បំពេញ​ទស្សនកិច្ច​នៅ​កម្ពុជា រយៈពេល ៥ថ្ងៃ គឺ​ចាប់​ពី​ថ្ងៃ​ទី៩ ដល់​ថ្ងៃ​ទី១៤ ធ្នូ ២០១២។ នេះ​ជា​លើក​ទី៨ ហើយ ដែល​លោក សុរិយា ស៊ូប៊ែឌី បាន​ធ្វើ​ទស្សនកិច្ច​មក​ប្រទេស​កម្ពុជា។ លោក សុរិយា ស៊ូប៊ែឌី មាន​ប្រសាសន៍​បញ្ជាក់​ថា លោក​បាន​ចងក្រង​របាយការណ៍​វិភាគ​ម៉ត់ចត់​ចំនួន​៤ ដែល​មាន​ខ្លឹមសារ និង​សារសំខាន់​ស្ដីពី​ស្ថានភាព​សិទ្ធិ​មនុស្ស​នៅ​កម្ពុជា និង​ឧបសគ្គ​ទាំង​ឡាយ​ដែល​ប្រទេស​កម្ពុជា កំពុង​ប្រឈម​ក្នុង​បំណង​លើក​ស្ទួយ និង​ការពារ​សិទ្ធិ​មនុស្ស​នៅ​ក្នុង​ប្រទេស​នេះ។ លោក​បាន​ធ្វើ​ការ​ប្រាស្រ័យ​ទាក់​ទង​ជាមួយ​អ្នក​ធ្វើ​ការ​សម្រាប់​សង្គម​កម្ពុជា ទាំង​អស់ រួម​មាន​សង្គម​ស៊ីវិល និង​ដៃគូ​អភិវឌ្ឍន៍។

លោក សុរិយា ស៊ូប៊ែឌី មាន​ប្រសាសន៍​បន្ថែម​តាម​សារ​អេឡិចត្រូនិក​ថា៖ «ខ្ញុំ​គ្មាន​ចេតនា​ណា​មួយ​ដើម្បី​ចាប់​បង្ខំ​អោយ​រដ្ឋាភិបាល​កម្ពុជា ទទួល​យក​សំណើ ឬ​អនុសាសន៍​របស់​ខ្ញុំ​ឡើយ។ កិច្ចការ​ដែល​ខ្ញុំ​កំពុង​ព្យាយាម​ធ្វើ​ទាំង​អស់​នេះ គឺ​ជា​ផ្នែក​មួយ​នៃ​កិច្ចការ​របស់​ខ្ញុំ ក្នុង​នាម​តំណាង​អោយ​អង្គការ​សហប្រជាជាតិ ដើម្បី​ផ្តល់​ឱវាទ​ដល់​រដ្ឋាភិបាល​ដែល​មាន​កាតព្វកិច្ច​ក្រោម​ច្បាប់​អន្តរជាតិ។ ជាមួយ​គ្នា​នោះ​ដែរ ក្នុង​នាម​ជា​អ្នក​ជំនាញ​ឯករាជ​របស់​អង្គការ​សហប្រជាជាតិ​ម្នាក់ ខ្ញុំ​ផ្តល់​យោបល់​ដើម្បី​ភាព​រីក​ចម្រើន​ទៅ​មុខ។ ខ្ញុំ​មាន​ការ​គោរព​យ៉ាង​ពេញ​លេញ​ចំពោះ​អធិបតីភាព​របស់​ប្រទេស​កម្ពុជា និង​រដ្ឋាភិបាល​ប្រទេស​នេះ»

កាល​ពី​ថ្ងៃ​ទី១០ ខែ​ធ្នូ ជា​ថ្ងៃ​ទិវា​សិទ្ធិ​មនុស្ស​អន្តរជាតិ លោក សុរិយា ស៊ូប៊ែឌី បាន​ផ្តល់​បទ​សម្ភាសន៍​ឲ្យ​វិទ្យុ​អាស៊ី​សេរី ដឹង​ថា ទស្សនកិច្ច​របស់​លោក​មក​កម្ពុជា ពេល​នេះ មាន​បំណង​តាម​ដាន​ការ​អនុវត្ត​អនុសាសន៍​​ចំនួន ៤​ចំណុច ដែល​លោក​បាន​ដាក់​ជូន​រដ្ឋាភិបាល​កម្ពុជា កន្លង​មក។

លោក ស៊ូប៊ែឌី មាន​ប្រសាសន៍​ថា លោក​ចង់​ដឹង​ថា តើ​រដ្ឋាភិបាល​កម្ពុជា ទទួល​យក និង​អនុវត្ត​អនុសាសន៍​របស់​លោក​បាន​កម្រិត​ណា មាន​ឧបសគ្គ​អ្វី ដែល​អនុវត្ត​មិន​បាន ហើយ​លោក​អាច​ជួយ​អ្វី​ទៀត ដើម្បី​ជំរុញ​ឲ្យ​អនុសាសន៍​ទាំង​នោះ​អនុវត្ត​បាន​ពេញ​លេញ។

អនុសាសន៍​ចំនួន​៤ របស់​លោក សុរិយា ស៊ូប៊ែឌី ដើម្បី​លើក​ស្ទួយ​នីតិរដ្ឋ ការ​គោរព​សិទ្ធិ​មនុស្ស និង​ប្រជាធិបតេយ្យ​នៅ​កម្ពុជា នោះ​រួម​មាន កំណែ​ទម្រង់​ប្រព័ន្ធ​តុលាការ​ដែល​លោក​ថា​គ្មាន​ការ​រីក​ចម្រើន​សោះ កំណែ​ទម្រង់​រដ្ឋសភា កំណែ​ទម្រង់​ការ​បោះ​ឆ្នោត និង​កំណែ​ទម្រង់​ដីធ្លី។

របាយការណ៍ និង​អនុសាសន៍​នានា​របស់​លោក សុរិយា ស៊ូប៊ែឌី អ្នក​រាយការណ៍​ពិសេស​របស់​អង្គការ​សហប្រជាជាតិ អំពី​ស្ថានភាព​សិទ្ធិ​មនុស្ស​នៅ​ប្រទេស​កម្ពុជា មាន​ការ​ទទួល​ស្គាល់ និង​វាយ​តម្លៃ​ខ្ពស់​ពី​មន្ត្រី​ការទូត​បរទេស​នានា​នៅ​កម្ពុជា។

នៅ​ក្នុង​ឱកាស​ខួប​លើក​ទី៦៤ ទិវា​សិទ្ធិ​មនុស្ស​អន្តរជាតិ តំណាង​សហភាព​អឺរ៉ុប ប្រចាំ​កម្ពុជា ក៏​បាន​លើក​ឡើង​ពី​ភាព​ចាំបាច់​នៃ​របាយការណ៍ និង​អនុសាសន៍​របស់​លោក ស៊ូប៊ែឌី និង​ស្នើ​ឲ្យ​រដ្ឋាភិបាល​កម្ពុជា ទទួល​ស្គាល់ និង​ធ្វើ​ការ​កែ​លំអ​ចំណុច​ខ្វះ​ខាត​តាម​របាយការណ៍​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (44)
Share

អ្នក​អាន​អនាមិក

ពី X6ZXTW3

រដ្្ជាភិបាលគួរតែទទួលយកសំណើររបស់លោកឌី​ បើលោកមិនបានធ្វើអ្វីខុស​ ហេតុអ្វីចាំបាច់គេចមុខ?គួរតែជួបដើម្បីកែលំអរនូវចំនុចខ្វះខាត់ខាងសិទ្ធិមនុស្សដែលរដ្ធាភិបាលមានភាពអសកម្មមួយចំនួនតូច

Dec 19, 2012 01:55 AM

Eagle Master

ពី Pa(USA)

Bases on his good performing we request United nation transfer him to China to restoring human rights,demencracy in Tibet,Kampeach Krom,Uygher,Inner Mongolia.
Because you can't close your eyes and than going to sleep,when you sleep evils will win ,Mr: Gorge Bush said.

Dec 17, 2012 06:38 PM

Peuv

Why Cambodia, once was an Empire of Angkor that controlled most of Thailand and half of Vietnam, is now reduced to country that can hardly stand on its own and that survives on foreign aids? One thing that makes Khmers most ashamed is that the Prime Minster has become a professional internal beggar who brags so much each time of his accomplishment from his foreign trip in securing aids from the Chinese who have become a boss not only of Hun Sen but also of Khmers. Hun Sen no longer fears anybody but the Chinese and the Vietnamese!

Dec 17, 2012 02:07 AM

អ្នក​អាន​អនាមិក

ខ្ញុំធ្លាប់បានស្តាប់សម្តេចនិយាយពីកូន ចៅរបស់គាត់ពីចំនួន
ប៉ុណ្ណេះ ប៉ុណ្ណោះហើយខ្ញុំយល់ថាលោកមានមនោសញ្ចេតនា
ជ្រាលជ្រៅចំពោះគ្រួសារលោកណាស់។តើលោកមាន
បានប្រើមនោសញ្ចេតនានេះចំពោះអ្នកដែលត្រូវគេប្លន់
ដីដែរឬទេ ព្រោះនេះជាប្រធានបទមួយដែលខ្ញុំយល់ថា
លោ សូរិយា សូ៑បែឌីនឹងលើកយកមកនិយាយ ចុះបើ
បដិសេធមិនជួបមានច្រកណាអាចចេញរួច? ឬមួយក៏អ្នក
ទាំងនោះពុំមែនជាប់សាច់ញាតិសម្តេចទេ? បើសិនជា
លោ សូរិយា សូ៑បែឌីនិយាយពីប្រយោជន៏ផ្ទាល់គាត់
យើងអាចដេញគាត់ចេញពីស្រុកយើងបានហើយរាស្ត្រ
ក៏មិនរវល់ទៅយំស្រែកអោយគាត់ជួយដែរ៕

Dec 17, 2012 12:22 AM

អ្នក​អាន​អនាមិក

មិនដឹងថាអ្នកណាទេដែលត្រូវបានរាស្ត្រខ្ពើមនោះ?

Dec 17, 2012 12:02 AM

មើល​មតិ​ទាំង​អស់.

គេហទំព័រ​ទាំងមូល